Qazaqstannyń eksporty 2020 jyly 18,2 paıyzǵa tómendedi

NUR-SULTAN. QazAqparat – Qazaqstannyń eksporty 2020 jyly 18,2 paıyzǵa tómendedi. Mundaı kórsetkishke Saýda jáne ıntegratsııa vıtse-mınıstri Qaırat Tórebaevtyń aıtýynsha álemdik pandemııa ákelgen daǵdarys sebep bolyp otyr, dep habarlaıdy QazAqparat tilshisi.

«Byltyr biz álemniń barlyq memleketimen birge kóptegen problemamen betpe-bet keldik. Álemdegi taýar naryǵyndaǵy suranys ótken jyly birshama tómendedi, júk tasymaldaý deńgeıi de azaıdy. Sheteldik bıznes-seriktestermen baılanys úzilip qaldy. Jalpy 2020 jyly álemdik saýda 9,2 paıyzǵa azaıǵan. Bizdiń saýda seriktes sanalatyn negizgi 10 memleketpen ekonomıkalyq belsendiligimiz ortasha eseppen 2,8 paıyzǵa qysqardy», - dedi vıtse-mınıstr Saýda jáne ıntegratsııa mınıstrliginiń alqa otyrysynda.

Onyń aıtýynsha álemdegi osy ahýal Qazaqstannyń eksportyna da áserin tıgizgen. Naqtyraq aıtqanda otandyq eksport kórsetkishi 18,2 paıyzǵa tómendegen. Áıtse de óńdelgen ónimniń eksporty tek 3,4 paıyzǵa azaıǵanyn atap ótý kerek.

«Munaı óndirisi azaıyp, onyń baǵasy quldyrap bara jatqan qazirgi kezeńde ekonomıkanyń shıkizattyq emes sektorynyń áleýetin arttyrý – bizdiń negizgi mindetimizge aınalyp otyr», - dedi ol.