Qazaqstannyń eksporttyq taýarlary 1,6 paıyzǵa qymbattady
NUR-SULTAN. QazAqparat - Aǵymdaǵy jylǵy qańtar-naýryzda eksporttalatyn taýarlarǵa baǵa - 1,6, al ımporttalatyn taýarlarǵa 2,1 paıyzǵa joǵarylady. Mundaı derekti QR UEM Statıstıka komıteti jarııa etti, dep habarlaıdy QazAqparat tilshisi.
Vedomstvo málimetinshe, ótken kezeńde eksporttyq jetkizilimder baǵasy temir kenderine - 24,3, kómirge - 17,2, qorǵasynǵa - 8,1, porlandtsementke - 5,1, mys kenderine - 4,7, munaıǵa 3,4 paıyzǵa joǵarylady. Al ferroqorytpalarǵa - 9,8, qara metall ılegine - 3,2, alıýmınııge - 1,2, myrysh kenderine - 2, hrom kenderine 1,7 paıyzǵa tómendedi. Baǵanyń bıdaıǵa - 4,1, arpaǵa - 1,9, maqtaǵa - 2,6, júnge 0,4 paıyzǵa joǵarylaýy, olardyń jarmalarǵa - 5,4, qantqa 1,5 paıyzǵa tómendeýi tirkeldi.
"Importtalatyn ónimderden kókónister - 28,5, shujyq ónimderi - 7,1, sút ónimderi - 3,9, balyq - 3,7, qus eti - 2,4, margarın - 2,2, shaı - 1,8, ósimdik maıy - 1,7, kofe - 1,5 paıyzǵa qymbattap, qant - 1,1, temeki 0,8 paıyzǵa tómendedi. Baǵa plastmassaǵa - 3,1, qaǵazǵa - 2,7, aıaqkıimge - 2,6, qurylys materıaldarǵa 2,5 paıyzǵa joǵarylady, bylǵaryǵa 0,8 paıyzǵa arzandady", - delingen komıtet aqparatynda.
