Qazaqstannyń ekonomıkalyq úlgisi ózgeriske enýi kerek - K. Saǵadıev
ASTANA. Qańtardyń 21-i. QazAqparat /Qanat Mámetqazyuly/ -Qazaqstannyń ekonomıkalyq úlgisi ózgeriske enýi kerek. Búgin QR Parlamentiniń depýtaty, UǴA akademıgi Kenjeǵalı Saǵadıevtyń «Daǵdarys óter de keter, al bolashaqty búginnen oılaý paryz» atty baspasóz betinde jaryq kórgen maqalasyn talqylaýǵa arnalǵan dóńgelek ústel jıyny barysynda sóz sóılegen avtor osylaı málim etti,
dep habarlaıdy QazAqparat.
«Maqaladaǵy áńgime ekonomıka salasyna qatysty respýblıkada oryn alyp otyrǵan ózekti máseleler jaıynda bolyp otyr. Jalpy, qazirgi jaǵdaılarǵa baılanysty Qazaqstannyń ekonomıkalyq úlgisi ózgeriske enýi qajet. Al ondaı ózgerister joǵary deńgeıli mamandardyń qatysýymen talqylanýy shart. Sonymen birge, keıingi kezderi aıtylyp júrgen josparlaý máseleleri de bizdiń ekonomıkadaǵy ózgeristerge bet burǵanymyz dep oılaımyn, biraq bul tııanaqty anyqtalmaǵan másele», dedi K. Saǵadıev.
Onyń aıtýynsha, Qazaqstan daǵdarysty op-ońaı eńsere alǵan joq, qazirdiń ózinde aıtarlyqtaı zardaptary da barshylyq. «Bank sektoryndaǵy, shaǵyn jáne orta bıznes salasyndaǵy shyǵyndar, búgingi kúni elimizge qajetti parametrlerge kóterilýge keri áserin tıgizdi. Qor naryǵyndaǵy joǵaltqanymyz da qomaqty. Sondyqtan da, biz daǵdarys barysynda bastan ótkergen qıynshylyqty durys baǵalamasaq, soǵan sáıkes salmaqty sharalardy da qabyldaı almaımyz», dedi K. Saǵadıev.
