«Qazaqstannyń ekonomıkalyq dıplomatııasy: Shyǵystan Batysqa» forýmy ótedi
ASTANA. QazAqparat - Aǵymdaǵy jyldyń sáýir aıynda «Qazaqstannyń ekonomıkalyq dıplomatııasy: Shyǵystan Batysqa» forýmy ótedi. Bul týraly búgin QR Syrtqy ister mınıstrliginiń alqa májilisinde vedomstvo basshysy Qaırat Ábdirahmanov aıtty, dep habarlaıdy QazAqparat.
«2018 jyldyń sáýir aıynda bizdiń dıplomatııalyq korpýstyń qatysymen birneshe is-shara uıymdastyrýdy josparlap otyrmyz. Solardyń biri - QR Premer-Mınıstri Baqytjan Saǵyntaevtyń qatysýymen ótetin «Qazaqstannyń ekonomıkalyq dıplomatııasy: Shyǵystan Batysqa» forýmy jáne elimizde akkredıttelgen shet memleketterdiń Elshileri ári Qazaqstannyń jetekshi isker qurylymdary men bıznesmenderin biriktiretin Dıplomatııalyq bıznes-klýbtyń qatysýymen eksporttyq strategııamyzdy tanystyrýǵa arnalǵan QR Investıtsııalar jáne damý mınıstrligimen, «KazakhExport» UK» AQ-men jáne «Atameken» UKP-men birlesken brıfıng», - dedi Qaırat Ábdirahmanov.
Mınıstrdiń sózine qaraǵanda, elimizdiń syrtqy saıasat vedomstvosy qorǵanys-ónerkásip kesheni kásiporyndarynyń ónimderin syrtqy naryqtarǵa ilgeriletý jumystaryn turaqty júrgizýde. Іs-sharalar uıymdastyrylyp, resmı jáne iskerlik delegatsııalardyń saparlary oryn alýda. Sonymen qatar sheteldik memlekettik organdarmen jáne kompanııalarmen kelissózder júrgizýge járdem kórsetip jatyr.
«Qorǵanys-ónerkásip kesheniniń qazaqstandyq kompanııalarynyń basym bóliginiń eksportty ilgeriletý nemese ınvestıtsııalar tartý týraly ótinishteri pysyqtaldy. Olardyń ishinde «Qazaqstan ǵarysh sapary» UK» AQ, «Qazarnaıyeksport» RMK, «Semeı Injınırıng» AQ, «ZKMK» AQ, «Kırov atyndaǵy zaýyt» AQ, «Qazaqstan Paramaýnt Injınırıng» JShS jáne basqalaryn atap kórsetýge bolady», - dedi ol.
