Qazaqstannyń ekologııalyq saıasat quraldary lastaný mólsherin azaıtý men tabıǵı resýrstardy utymdy paıdalanýdy yntalandyrmaıdy - EO jobasy
ASTANA. Naýryzdyń 11-i. QazAqparat /Qanat Mámetqazyuly/ - Búgin QR Parlamenti Májilisinde «Qazaqstan Respýblıkasynda ekologııalyq saıasattyń quraldary» atty taqyrypta dóńgelek ústel jıyny bolyp ótti.
Sharany Májilistiń Ekologııa máseleleri jáne tabıǵat paıdalaný komıteti men Eýropalyq Odaqtyń «Qazaqstan Respýblıkasynda ekologııalyq saıasattyń quraldaryn engizý» atty jobasy birlese uıymdastyrdy, dep habarlaıdy QazAqparat.
Dóńgelek ústel jumysy elimizde júzege asyp otyrǵan ekologııalyq saıasattyń quraldary men tetikteriniń tıimdiligin talqylaýǵa arnalyp otyr. «Búgingi basqosýdyń taqyryby óte ózekti bolyp tabylady ári bunyń úlken tájirıbelik máni de bar. Óıtkeni, basqarý durys ári tıimdi quraldardyń tańdalyp alynýy ekologııalyq saıasattyń nátıjeli júzege asýyna septigin tıgizetini anyq. Osy turǵydan alǵanda búgingi otyrystyń maqsaty Eýropalyq Odaq tarapynan iske asyrylyp otyrǵan joba sheńberinde otandyq jáne halyqaralyq sarapshylar júrgizgen ekologııalyq saıasattyń qoldanystaǵy quraldar júıesin taldaý nátıjelerimen tanystyrý, sondaı-aq Qazaqstandaǵy ekologııalyq saıasattyń quraldaryn jetildirý boıynsha usynystar ázirleý bolyp tabylady», dedi jıynǵa jetekshilik etken Ekologııa máseleleri jáne tabıǵatty paıdalaný komıtetiniń hatshysy, depýtat Valerıı Kotovıch.
Dóńgelek ústel barysynda EO jobasy sheńberinde júrgizilgen Qazaqstandaǵy ekologııalyq saıasat quraldarynyń qoldanylýyna taldaýlar boıynsha baıandamanyń tanystyrylymy ótkizildi. Jalpy, taldaý nátıjeleri elimizdegi qorshaǵan ortanyń sapasyn basqarý quraldarynyń qoldanystaǵy júıesi aıtarlyqtaı tıimdi bolmaı otyrǵanyn kórsetken. Sarapshylardyń basym bóliginiń pikirinshe, bundaı quraldar lastaný mólsherin azaıtý men tabıǵı resýrstardy utymdy paıdalanýdy yntalandyrmaıdy.
Dóńgelek ústel jumysyna Parlament depýtattary, QR Qorshaǵan ortany qorǵaý mınıstrliginiń ókilderi, úkimettik emes uıymdar ókilderi, qorshaǵan ortany qorǵaý jónindegi halyqaralyq jáne otandyq sarapshylar toby qatysty.
