Qazaqstannyń eko-etno týrızmdi damytýyna múmkindigi mol - Rashıda Shaıkenova
ALMATY. QazAqparat Biz, dástúri, tarıhy uqsas kórshilerimiz: Mońǵolııa (kóshpendi el), Ózbekstan, Qyrǵyzstan týrızimen bólek ózimizdiń qazaqy dúnıelerimizdi týrtoptamalarymyzǵa qosyp, usyna bilýimiz kerek, dedi Qazaqstan Týrıstik qaýymdastyǵynyń dırektory Rashıda Shaıkenova Qazaqtyń sport jáne týrızm akademııasynda ótken dárisinde, dep habarlaıdy «QazAqparat» tilshisi.
«Biz, dástúri, kóshpeli ómir salty, tarıhy uqsas kórshilerimiz Mońǵolııa (kóshpendi el), Ózbekstan, Qyrǵyzstan týrızimen bólek ózimizdiń qazaqy dúnıelerimizdi týrtoptamalarymyzǵa qosyp usyna bilýimiz kerek. Bul jaǵynan aıtqanda, bizdiń tereńnen tamyr tartqan mádenıetimiz bar. Altaı arqyly ózge qurlyqtarǵa qonys aýdarǵan adamzat tarıhy da bizdiń jerimizde ótkenin kórsete alýymyz qajet. Bizdiń dastarhanymyz da erekshe. Túrkilerdiń kóshpeli órkenıeti júzdegen jyldary boıy bizdiń mádenıetimizdi qalaı qalyptastyrdy, kóshpendi ómiriniń ajyramas bóligi: tulpar at, tazy ıt sekildi baılyǵymyzdy óz deńgeıinde kórsete alýymyz kerek. Biz týrısterimizge osylardy usynýymyz qajet», - deıdi Qazaqstan Týrıstik qaýymdastyǵynyń dırektory Rashıda Shaıkenova.
Sonymen qatar, ol ekotýrızmge etno týrızmdi qosý qajettigin aıtty.
«Ekonomıkany ártaraptandyrý aıasynda arzan jumys kúshimen qamtamasyz ete alatyn salany damytý qajet bolyp otyr. Bul járde árıne, týrızm yńǵaıly sala. Ekinshi jaǵynan, týrızm qyzmet kórsetý salasy. Qyzmet kórsetý salasynyń artýy memlekettik damýyn tanytady. Búginde ishki jáne kóshpeli týrızmdi damytý mańyzdy. Biz qazir álemdik týrızm naryǵynda tanylýǵa bet alyp otyrmyz. Biz sheteldik týrısterdiń kelýin qalaımyz. Salýatty ómir saltyn saqtaýǵa, qysqa merzimdi shıpagerlik demalysyn uıymdastyrý bizdiń azamattarymyz úshin de tıimdi bolmaq. Óıtkeni, bizdiń elimizde aıtarlyqtaı týrıstik resýrstar bar. Alaıda, biz jappaı týrızm damyǵan el emespiz. Bizdiń elimizde ekologııalyq týrızmdi damytýǵa bolady. Oǵan, etnologııalyq týrızmdi qossaq, týrıster molynan tartylady», - dedi ol.
Aıta keteıik, Búkilálemdik týrıstik uıymnyń (BUDTU) málimetteri boıynsha, álemde 1980 jyldan bastap, 2013 jyl aralyǵynda týrıster aǵymy 4 ese (278 mln-nan 1087 mln adamǵa) ósken.
Mamandardyń aıtýynsha, bizdiń elimizde aıtarlyqtaı baı tabıǵı-klımattyq, mádenı, tarıhı muralar jáne týrıstik salany sapaly damytý úshin jáne ulttyq ekonomıkaǵa tabys túsirý úshin mol múmkindik bar.
