Qazaqstannyń ekinshi boksshysy Álem chempıonatyndaǵy jarysyn aıaqtady
ASTANA. QazAqparat - Germanııanyń Gambýrg qalasynda ótip jatqan Bokstan álem chempıonatynda óziniń alǵashqy kezdesýin 52 keli salmaq dárejesine deıingi sportshymyz Azamat Isaqulov ótkizdi, dep habarlaıdy QazAqparat.
Onyń qarsylasy Ońtústik Koreıa ókili boldy. Jekpe-jek birjaqty ótti, Inkıý Kım qazaqstandyq boksshyny aıqyn basymdyqpen jeńdi, esep - 0:5.
Aıta keteıik, 26 tamyz kúni Álem chempıonaty aıasyndaǵy alǵashqy jekpe-jekterin Qazaqstannyń úsh boksshysy ótkizdi.
Buǵan deıin Abylaıhan Júsipov (69 kelige deıin) mysyrlyq Valıd Saıd Mohamedti tóreshilerdiń biraýyzdy sheshimimen jeńdi. Al grýzın Otar Eranosıanmen kezdesken Ádilet Qurmetov (60 kelige deıin) baıraqty dodadaǵy jarysyn aıaqtaýǵa májbúr boldy.
Eske salaıyq , 25 tamyz kúni sharshy alańǵa alǵashqy bolyp shyqqan 49 kelige deıingi salmaqtaǵy boksshymyz Erjan Jomart gvatemalalyq qarsylasy Maıkl Tele Teleni qapy qaldyrsa, 56 kelide synǵa túsken Qaırat Eralıev te birinshi aıqasyn jeńispen bastady. Eralıev birinshi jekpe-jeginde meksıkalyq Krıstofer Flores Maganany aıqyn basymdyqpen utty.
Álem chempıonatynda úshinshi bolyp rıngke shyqqan 75 kelilik boksshymyz Ábilhan Amanqul da qarsylasy - avstralııalyq Kempbell Somervıldi aıqyn basymdyqpen jeńgen bolatyn.
Sondaı-aq 64 kelige deıingi salmaqtaǵy Bekdáýlet Ibragımov baıraqty dodadaǵy jarysyn jeńispen bastady.
Eske salaıyq, 25 tamyz kúni bastalǵan Bokstan álem chempıonaty toǵyz kúnge jalǵasyp, 2 qyrkúıek kúni márege jetedi. Qazaqstan quramasy barlyq 10 salmaq dárejesinde synǵa túsetin bolady. Olar - 49 keli salmaqta Erjan Jomart, 52 keli salmaqta Azamat Isaqulov, 56 keli salmaqta Qaırat Eralıev, 60 kelide Ádilet Qurmetov, 64 kelide Bekdáýlet Ibragımov, 69 kelide Abylaıhan Júsipov, 75 kelide Ábilhan Amanqul, 81 kelide Erik Áljanov, 91 kelide Vasılıı Levıt jáne asa aýyr salmaqta Qamshybek Qońqabaev.
Jarysqa álemniń 85 elinen 280 boksshy kelgen.
