Qazaqstannyń eki mádenıet qaıratkerine «Astana qalasynyń qurmetti azamaty» ataǵy berildi
ASTANA. QazAqparat - Astanany damytýǵa sińirgen eńbektiń basty dálelderiniń biri - «Astana qalasynyń qurmetti azamaty» ataǵyna ıe bolý. Bul belgimen elordanyń tanymal tulǵalary marapattalǵan.
Atap aıtqanda, Memleket basshysy Nursultan Nazarbaev, KSRO Halyq ártisi Bıbigúl Tólegenova, Qazaq Ulttyq mýzyka akademııasynyń rektory Aıman Musaqojaeva jáne t.b. Búgin besinshi shaqyrylymdaǵy qalalyq máslıhattyń kezekti sessııasynda elimizdiń eki mádenıet qaıratkerine - «Astana Opera» memlekettik opera jáne balet teatrynyń dırektory Tólegen Muhamedjanov pen Qazirgi zamanǵy óner murajaıynyń dırektory Nellı Shıvrınaǵa «Astana qalasynyń qurmetti azamaty» ataǵyn berý týraly sheshim qabyldandy, dep jazady astana.gov.kz.
«Bir jaǵynan maǵan óte qurmetti ári jaýapty mindet júktelip otyr, Qazaqstan Respýblıkasy men elordanyń mádenıeti men ónerin damytýǵa orasan qosqan úlesi úshin Muhamedjanov Tólegen Muhamedjanuly men Shıvrına Nellı Vıktorovnaǵa «Astana qalasynyń qurmetti azamaty» ataǵyn berý», - dedi Astana qalasy ákiminiń orynbasary Ersaıyn Naǵaspaev.
Aıta keteıik, Tólegen Muhamedjanov - QR Memlekettik syılyǵynyń laýreaty, QR eńbegi sińgen qaıratkeri, «Parasat» ordeniniń kavaleri, «Mádenıet» atalymynda «Jyl adamy -2012» halyqaralyq syılyǵynyń ıegeri.
Nellı Shıvrına - «Mádenıet kaıratkeri» tós belgisimen, «Shapaǵat», «QR táýelsizdigine 10 jyl» medaldarymen marapattalǵan, basqa da mereıtoılyq nagradalardyń ıegeri, Polsha Respýblıkasynyń eńbek sińirgen mádenıet qaıratkeri.
