19:38, 20 Aqpan 2013 | GMT +6
Qazaqstannyń eki azamaty QHR-da esirtki kontrabandasy úshin ustaldy
BEIJІŃ. 20 aqpan. QazAqparat - Qytaı men Qazaqstan shekarasynda esirtki kontrabandasynyń joly kesildi.
Bul týraly «Sıntszıan dýshıbao» gazeti jazdy.
QHR qoǵamdyq qaýipsizdik organdarymen júrgizilgen jedel shara nátıjesinde, aǵymdaǵy jyldyń qańtar aıynda QHR Shyńjan-Uıǵyr avtonomııalyq ólkesiniń «Zımýnaı» keden qosynynda esirtki alyp ótpek bolǵan kezinde Qazaqstannyń eki azamaty jáne Qytaı azamaty ustaldy.
Qytaılyq polıtsııadan alynǵan aqparatqa zer salsaq, ustalǵan úsh er adam qylmystyq baılanysqa túsip, aldyn ala kelisip, qytaı-qazaqstan shekarasy arqyly esirtki tasymaldaýdy josparlaǵan. Olardan 5 keliden artyq esirtki tabyldy.
Aldyn ala tergeý barysynda anyqtalǵandaı, esirtki Úrimshi qalasynda satyp alynǵan. Qazirgi ýaqytta kúdiktiler qamaýǵa alyndy, olardyń qamaýda bolý merzimi 30 táýlikke deıin uzartyldy.
