Qazaqstannyń EAEO elderimen saýdasynda Reseı úlesi – 92,4%

ASTANA. QazAqparat – Qazaqstannyń EAEO elderimen syrtqy saýdasynda Reseıdiń úlesi 92,4% quraıdy, dep habarlaıdy QazAqparat QR Strategııalyq josparlaý jáne reformalar agenttigi Ulttyq statıstıka bıýrosyna silteme jasap.

«Bıylǵy qańtarda Qazaqstan Respýblıkasynyń EAEO elderimen ózara saýda 2130,4 mln AQSh dollaryn qurap, ótken jyldyń sáıkes kezeńimen salystyrǵanda nomınaldy mánde 19,1% artty», - delingen aqparatta.

Eksport 932,7 mln AQSh dollaryna (52,9% joǵary) jasalsa, ımport 1197,7 mln AQSh dollaryn (1,7% joǵary) qurady.

Qazaqstannyń EAEO elderimen syrtqy saýda aınalymynyń jalpy kóleminde Reseı úlesi – 92,4%, Qyrǵyzstan – 4,2%, Belarýs – 3,3%, Armenııa – 0,1%.

EAEO elderimen eksportta hımııalyq elementter boıynsha 9,6 ese ósim baıqalady. Bul rette kúıdirilgen pırıtti qosa alǵanda, temir kenderi men kontsentrattary boıynsha tómendeý bar – 81,3% az.
Importta eń úlken ósim (3 ese) qara metaldan jasalǵan qubyrlar men basqa tútikter (mysaly, dánekerlengen, toıtarylǵan) boıynsha tirkeldi. Bul rette jeńil avtomobılder jáne ózge de motorly kólik quraldary boıynsha (99,9% az) tómendeý bar.