Qazaqstannyń djıý-djıtsý sheberleri Horvatııadaǵy týrnırde 4 medal jeńip aldy
NUR-SULTAN. QazAqparat – Qazaqstannyń djıý-djıtsý sheberleri Samat Aıtpanbet, Qazybek Tájibaı jáne Shyńǵys Ábilqat AJP Tour Europe Youth – GI ashyq eýropalyq chempıonatta tórt medal jeńip aldy. Baıraqty básekege Horvatııanyń Splıt qalasynda ótti, dep habarlaıdy QazAqparat tilshisi.
Jarysqa álemniń 20-dan astam elinen kompanda qatysty. Qazaqstan namysyn Armııa generaly Saǵadat Nurmaǵambetov atyndaǵy klýbtyń úsh sportshysy qorǵady.
8 jasar Qazybek Tájibaı birinshi oryn alsa, 12 jasar Shyńǵys Ábilqat pen 24 jastaǵy Samat Aıtpanbet qola medal ıelendi.
Sonymen qatar Samat ıspandyq komanda quramynda legıoner retinde jarys jolyna shyǵyp, olarǵa álemdik chempıont joldamasyn alyp berdi.
Jalpy, sportshylarymyz bir altyn, bir kúmis jáne eki qola medal jeńip aldy.
Olar qazaqstandyqtardy Konstıtýtsııa kúnimen quttyqtap, jeńisin elimizge arnady.
Djıý-djıtsý men grepplıngten álem chempıony, halyqaralyq sanattaǵy Qazaqstannyń sport sheberi Samat Aıtpanbet Saǵadat Nurmaǵambetov atyndaǵy klýbta jattyqtyrýshy bolyp jumys isteıdi.
Ol Horvatııa chempıonatynda 56 keli salmaq sanatynda óner kórsetýi tıis bolatyn.
Alaıda bul salmaqta qarsylastyń bolmaýyna baılanysty 62 kelige deıingi salmaq sanatynda jarys jolyna shyqty.
«Jarystyń ekinshi kúninde komandalyq beldesýler ótti. Men legıoner retinde ıspan komandasy quramynda boldym. Eki kezdesýde de qarsylastaryma aýyrtý ádisin qoldanyp, merziminen buryn jeńiske jettim. Komandalyq esep nátıjesinde nemister jeńiske jetse, ekinshi oryn ıspandyqtarǵa, al úshinshi oryn horvattarǵa buıyrdy. Onyń bári álem chempıonatyna joldama aldy», - dedi Samat Aıtpanbet.
