Qazaqstannyń dúken sórelerinde Qyrǵyzstannyń qaýipti ónimderi satylýda

ASTANA. QazAqparat - «RIHA» óndirgen «Ispanskaıa» pisirilgen-ystalǵan salıamı shujyǵy synamalarynan ishek taıaqshalary tobynyń bakterııalary, al «Ýmýt ı Ko» JShQ óndirgen «Den ı Noch» shokolad jáne aq glazýrdaǵy kilegeı eskımosynyń synamalarynan tamaqtan ýlaný týǵyzatyn Staphylococcus aureus anyqtaldy, dep habarlaıdy QazAqparat tilshisi QR DSM qoǵam densaýlyǵyn saqtaý komıtetiniń baspasóz qyzmetine silteme jasap. 

«Sonymen qatar, «Emılııa» JShS-niń 45% «gollandııalyq irimshik» óniminiń synamalarynan ishek taıaqshalary tobynyń bakterııalary tabyldy. Bul rette óndirýshi «Emılııa» JShS júrgizilgen sanıtarııalyq-epıdemııaǵa qarsy is-sharalardan, sondaı-aq zerthanalyq baqylaýdan keıin Qazaqstannyń tutynýshylyq naryǵyna qaýipti ónimdi jibermeý týraly kepildik bergen. Alaıda búgingi kúni osy kepildikter saqtalmaı otyr, bul kásiporynda tıisti óndiristik baqylaýdyń ótkizilmeıtinin, sonymen birge logıstıka erejeleriniń buzylǵanyn kórsetedi» delingen habarlamada.

Osy ónimderdiń barlyǵy Keden odaǵynyń «Tamaq óniminiń  qaýipsizdigi týraly» 021/2011 KO TR, «Et jáne et ónimderiniń qaýipsizdigi týraly» 034/2013 KO TR, «Sút jáne sút ónimderiniń qaýipsizdigi týraly» 033/2013 KO TR jáne «Tańbalaý bóligindegi tamaq ónimi» 022/2011 KO TR tehnıkalyq reglamentteriniń talaptaryna sáıkes kelmeıdi. 

Búginde atalmysh komıtet talapqa saı kelmeıtin ónimdi alý jáne joıý boıynsha is-sharalar júrgizip, respýblıkanyń barlyq aýmaǵynda zerthanalyq baqylaýdy kúsheıtýde.

Sondaı-aq Qyrǵyzstan Respýblıkasynyń Densaýlyq saqtaý mınıstrligine atalǵan josyqsyz óndirýshilerdiń qyzmetin baqylaýǵa alý jóninde habarlama jiberildi.