Qazaqstannyń DSU-ǵa kiretin kezeńi jaqyndady
ASTANA. QazAqparat - Qazaqstannyń Dúnıejúzilik Saýda Uıymyna kirý kezeńi jaqyndap qaldy. Bul týraly búgin Parlament Senatynyń jalpy otyrysynda QR Ulttyq ekonomıka mınıstri Erbolat Dosaev málimdedi.
Mınıstrdiń sózine qaraǵanda, qazirgi tańda Qazaqstan Dúnıejúzilik saýda uıymyna kirý barysyndaǵy kelissózderdiń sońǵy satysyn júrgizip keledi.
«Kópjaqty jáne ekijaqty kelissózder belsendi júrip jatyr. Eýropa Odaǵy jáne AQSh-qa baılanysty eki negizgi másele bar bolatyn. Sonyń ishinde Eýropa Odaǵy boıynsha máseleler sheshildi dep aıtýǵa bolady. Jaqyn aralyqta ekijaqty kelisimge qol qoıatyn bolamyz. Sonymen qatar, kópjaqty máseleler boıynsha, sonyń ishinde aýyl sharýashylyǵyn qoldaýǵa qatysty suraqtar da birjaqty yńǵaılanyp qaldy deýge bolady», - dedi depýtattar suraǵyna jaýap bergen mınıstr Dosaev.
Onyń aıtýynsha, qazirgi tańda DSU-ǵa qosylǵan Reseı tarapynan oryn alǵan kedergiler eńserilgen. «Osyǵan oraı, aǵymdaǵy jyldyń sońyna deıin kelissózder belsendi túrde júrgizilse, sonyń nátıjesi boıynsha Qazaqstannyń DSU-ǵa naqty qaı ýaqytta kiretini de aıqyn bolady», - dedi Erbolat Dosaev.
