Qazaqstannyń DSU aıasyndaǵy aýyl sharýashylyǵy baǵytyndaǵy kelissózderi kúrdeli kúıinde qalyp otyr- J. Aıtjanova
ASTANA. 18 qarasha. QazAqparat - DSU aıasyndaǵy aýyl sharýashylyǵy sýbsıdııalaryna qatysty kelissózder kúrdeli kúıinde áli de jalǵasyp jatyr. Búgin Parlament Májilisindegi Úkimet saǵatynda Ekonomıkalyq ıntegratsııa isteri mınıstri Janar Aıtjanova osylaı málim etti.
Baıandama barysynda mınıstr Úkimet tarapynan aýyl sharýashylyǵy sýbsıdııalaryna qatysty óte kúrdeli kelissózder áli júrgizilip jatqanyn atap ótti. Onyń aıtýynsha, qazirgi tańda Úkimettiń aldynda turǵan asa mańyzdy mindetterdiń biri bul bolashaqta aýyl sharýashylyǵyn damytýǵa múmkindik beretin memlekettik sýbsıdııalardyń jetkilikti kólemi týraly kelisimge qol jetkizý bolyp tabylady. «Osy rette DSU talaptary boıynsha aýyl sharýashylyǵy salasynyń ınstıtýtsıonaldyq damýyna jáne aýyl ınfraqurylymyna salýǵa baǵyttalǵan memleket tarapynan beriletin sýbsıdııalardy nemese kómekti shekteýsiz júzege asyra alatynyn aıtý qajet. Búgingi kúni bul kómektiń mólsheri 47,4 mlrd. teńgeni qurap otyr. Bul DSU-ǵa ótkennen keıin de memleket tarapynan esh shekteýsiz artyla beredi», dedi J. Aıtjanova.
Onyń sózine qaraǵanda qazirgi kelissózder barysynda otandyq jáne aýyl sharýashylyq taýarlar baǵasy men ózindik qunyna áser etetin sýbsıdııalar kólemi talqylanyp otyr. Atalmysh sharalarǵa janarmaı qunynyń, asyl tuqymdy ónimniń jáne mıneraldyq tyńaıtqyshtardyń baǵasyn arzandatýǵa baǵyttalǵan sýbsıdııalar jáne paıyzdyq stavkalary jeńildetilgen agronesıeler sekildi memlekettik kómekter jatady. «Mundaı sýbsıdııalar aıasynda bizdiń kelissózderimiz áli jalǵasyp jatyr. Jalpy aýyl sharýashylyǵy salasyndaǵy kelissózder Úkimettiń «Agrobıznes-2020» baǵdarlamasynda qarastyrylǵan sýbsıdııalar sheńberinde júrgizilip otyr. Bul kelissózderdiń nátıjesi Qazaqstannyń ekonomıkalyq jáne áleýmettik damýyna asa mańyzdy. Óıtkeni halqymyzdyń jartysy aýyldyq jerlerde tirshilik etip jatyr», -dedi J. Aıtjanova.
