Qazaqstannyń dosy da, jamanshylyq oılaıtyndar da bar - QR Prezıdenti
«Quqyq qorǵaý organdarynyń barshasy, Qazaqstan áskeri bıyl 25 jyldyq merekelerin atap ótip jatyr. Sebebi, Táýelsizdigimizdiń 25 jyldyǵyn byltyr toıladyq. Ózderińiz bilesizder, 16-shy jeltoqsanda Táýelsizdik jarııaladyq. Kelesi 1992 jyldyń basynan bastap, ózimizdiń árbir mekemelerimizdi qura bastadyq. Óz áskerimiz bolǵan joq. Ony qurdyq. Óz polıtsııamyz bolǵan joq. Ony da qurdyq. Qaýipsizdik komıteti de bolǵan joq. Ony da qurdyq. Syrtqy ister saıasatynyń da mınıstrligi bolǵan joq. Ony da qurdyq. Basqasynyń barlyǵyn quryp kele jatyrmyz. Búgin memlekettik organdardyń barlyǵy quryldy. Tıisti mekemelerdiń barlyǵy quryldy», - dep atap ótti Memleket basshysy.
Qazaqstan Prezıdenti elordamyzdy tuńǵysh ret ózimiz tańdap, Saryarqanyń tósine salǵanymyzdy, tóńiregimizdegi barlyq eldermen beıbitshilik kelisimi bar ekendigi, kórshilerimizben dostyq pen senim shekaralaryn ornatqanymyzdy atap ótti.
«Al alys eldermen de qarym-qatynasymyz jaqsy. Saıası jaǵynan barlyǵyn ornattyq. Degenmen el el bolý úshin, táýelsizdik myqty bolý úshin esh ýaqytta qol qýsyryp, tynysh jatpaýymyz kerek. «Úı ózimdiki deme, úı syrtynda bóri bar» degen qazaqtyń sózi bar. Ol sizder úshin aıtylǵan. Ár ýaqytta bizdiń elimizge, baılyǵymyzǵa, turaqtylyǵymyzǵa, Qazaqstannyń búkil dúnıejúzindegi abyroıyna, bedeline qyzǵanatyn adamdar az emes. Dosymyzda kóp. Jamanshylyq oılaıtyndary da bar. Ókinishke qaraı, ishimizde de kezdesedi. Sondyqtan osynyń barlyǵyn Konstıtýtsııalyq júıemizdi saqtaý, memlekettiń qaýipsizdigin qorǵaý, memlekettiń kúsheıtý jolynda jumys isteý, ekonomıkalyq, ishki, syrtqy qaýipsizdik barlyǵy birge júredi. Sondyqtan men komıtet qyzmetkerleriniń barlyǵyna senemin. Jumystary alǵa jyljı bersin, ózderine jáne januıalaryna eń izgi tilekterdi tileımin», - dedi Memleket basshysy.
