Qazaqstannyń Doing Business-tegi reıtıngin jaqsartý máseleleri talqylandy

ALMATY. QazAqparat - Almatyda sarapshylar, kásipkerler, memlekettik organ jáne bıznes qaýymdastyq ókilderi Dúnıejúzilik banktiń Doing Business reıtınginde Qazaqstannyń pozıtsııasyn jaqsartý múmkindikterin talqylady, dep habarlaıdy QazAqparat tilshisi.

Atap aıtqanda, kásipkerlik salasyndaǵy reformalar, bıznes klımatty jaqsartý týraly oılar aıtyldy.

Sharaǵa QR Ulttyq ekonomıka, Indýstrııa jáne ınfraqurylymdyq damý, Energetıka, Qarjy, Ádilet mınıstrlikteriniń , sondaı-aq QR Ulttyq banktiń, Almaty ákimdiginiń, «Atameken» UKP-nyń ókilderi qatysty.

Ulttyq ekonomıka mınıstrliginiń Kásiperlikti damytý departamentiniń dırektory Aslanbek Jaqypovtyń aıtýynsha, Qazaqstanǵa bıznesti júrgizý boıynsha álemniń úzdik 30 eliniń qataryna enýine kásipkerlik salasyndaǵy aýqymdy reformalar septigin tgizgen.

«Bunymen shektelip qalýǵa bolmaıdy. 2018 jyldyń qorytyndysy boıynsha Qazaqstan 28-orynda tur. Bes jyl buryn 82-orynda turǵan edik. Buǵan zańnamaǵa engizilgen ózgerister, ruqsat qujattarynyń azaıýy, kásiporyndy tirkeý, halyqaralyq saýda, kelisimsharttardy júzege asyrýdy qamtý boıynsha jasalǵan tıimdi reformalar septigin tıgizdi. Bul reıtıngke 190-nan astam el qatysady. Olardyń barlyǵy kórsetkishterin jaqsartýǵa tyrysyp jatyr», - dedi Aslanbek Jaqypov.

Jıyn barysynda kásipkerler ózderin alańdatqan zań, bıznes, tirkeý salalary boıynsha suraqtaryna jaýap aldy.