Qazaqstannyń densaýlyq saqtaý salasyndaǵy reformalary oń nátıjesin kórsetti - E. Baıjúnisov
ASTANA. QazAqparat - Qazaqstannyń densaýlyq saqtaý salasynda júrgizilgen reformalardyń oń nátıjeleri kórinip otyr. Bul týraly búgin Astanada qaterli isikti emdeý taqyrybyna arnalǵan halyqaralyq ǵylymı-tájirıbelik konferentsııada elorda densaýlyq saqtaý basqarmasynyń basshysy Erik Baıjúnisov málim etti.
«Sońǵy jyldary Qazaqstannyń densaýlyq saqtaý júıesinde aýqymdy ózgerister oryn alyp, sonyń oń nátıjelerin qazirden-aq kórip otyrmyz. «Salamatty Qazaqstan» baǵdarlamasy, Qazaqstandaǵy onkologııalyq kómekti damytýdyń 2012-2016 jyldarǵa arnalǵan baǵdarlamasy bul salanyń tehnologııalyq jabdyqtalýyna eleýli úles qosty. Osy baǵdarlamalar qaterli isikke shaldyqqan emdelýshilerdi emdeý men dıagnostıkalaýdyń zamanaýı ádis-tásilderin engizýge múmkindik berdi», - dedi E. Baıjúnisov.
Onyń sózinshe, búginde eń mańyzdy maqsattardyń biri - ol joǵary bilikti mamandardy daıarlaý men tıimdi kadr saıasatyn júrgizý. Bul saıasatty júzege asyrý barysynda QR Densaýlyq saqtaý jáne áleýmettik damý mınıstrligi otandyq onkologııanyń jetekshi mamandaryna, medıtsınalyq ǵylymnyń damýynyń ınnovatsııalyq tásilderin ázirleıtin ǵylymı jáne medıtsınalyq uıymdarǵa arqa súıeıdi.
Atap aıtqanda, konferentsııada onkologııanyń barlyq salalary taqylanady, ıaǵnı neırohırýrgııadan ımmýnologııaǵa deıin, oǵan qosa radıatsııalyq medıtsına, dári-dármekpen qamtamasyz etý, zamanaýı hırýrgııa máseleleri, qaterli isikke qarsy jańa preparattar jáne basqa da kóptegen máseleler qaralady.
