Qazaqstannyń densaýlyq saqtaý salasynda jeke ınvestıtsııany tartýǵa ekpin qoıylady
«Jańa memlekettik baǵdarlama aıasynda negizgi ekpin jeke ınvestıtsııalardy tartýǵa qoıylady. Memleket jáne Úkimet ınfraqurylymdy damytýǵa, qurylysqa, jabdyqtaýǵa ınvestıtsııalar kólemin qysqartady jáne memlekettik-jekemenshik seriktestikke basymdyq beriledi», - dedi vıtse-mınıstr.
Osy oraıda ol elimizde jeke sektorǵa tıisti jaǵdaı jasalatynyn atap ótti.
«ıAǵnı, jeke sektor júıege kirip, halyq úshin medıtsınalyq qyzmetterdi kórsetedi, sondaı-aq bul sharalar mindetti medıtsınalyq saqtandyrý júıesimen tólenedi. Sonymen qatar tegin medıtsınalyq kómektiń kepildendirilgen kólemi de bolady»,-dedi E. Birtanov.
Mınıstrlik málimetine qaraǵanda, densaýlyq saqtaý júıesiniń qarjylyq turaqtylyǵyn qamtamasyz etý maqsatynda 2017 jyldan bastap Qazaqstanda mindetti áleýmettik medıtsınalyq saqtandyrý engiziletin bolady (ári qaraı - MÁMS). Memleket azamattardyń 15 sanaty úshin (onyń ishinde 12-si halyqtyń áleýmettik turǵydan osal toptary) jarna tóleıtin bolady. Jumys berýshiler - jaldamaly jumysshylar úshin, qyzmetkerler men salyq organdarynda tirkelgen ózin-ózi qamtyǵan azamattar ózderi úshin tóleıtin bolady.
Búgingi tańda mindetti áleýmettik medıtsınalyq saqtandyrý boıynsha Jol kartasy ázirlenip, bekitildi. Atalǵan qujatqa sáıkes, bıylǵy jyly normatıvtik-quqyqtyq baza jasalyp, Áleýmettik medıtsınalyq saqtandyrý qory qurylatyn bolady (ári qaraı - ÁMSQ). Bul 2017 jylǵy 1 qańtardan bastap belgilengen somany jınaqtaý jáne 2017 jylǵy 1 shildeden bastap ÁMSQ arqyly medıtsınalyq qyzmetter tólemderin júzege asyrýǵa múmkindik beredi.