Qazaqstannyń densaýlyq saqtaý salasyn reformalaý jobasy eki jylǵa uzartyldy

Bul týraly búgin Astanadaǵy jıynda QR Densaýlyq saqtaý mınıstrligi Strategııalyq damý departamentiniń dırektory Bolat Tókejanov málim etti.

Onyń aıtýynsha, Damý jáne qaıta qurý halyqaralyq bankiniń qatysýymen qolǵa alynǵan jobanyń jalpy quny 296,1 mln. dollardy qurap otyr. Onyń ishinde 117,7 mln. dollar bankten zaım retinde alynsa, 178,4 mln. AQSh dollary respýblıkalyq bıýdjetten bólindi.  

«Jobanyń negizgi maqsaty - otandyq medıtsına salasyn halyqaralyq standarttarǵa saı jańartý. Ol qujat retinde 2008 jyly aqpan aıynda rásimdelgen bolatyn. Osy jyly ol arnaıy zańmen ratıfıkatsııalandy. Bas kezinde biz besjyldyq jobany 2008 jyldyń orta sheninde bastap, 2013 jyly aıaqtaımyz dep josparladyq. Alaıda, ol 2009 jyly qolǵa alynyp, tek 2010 jylda ǵana naqty iske asyryla bastady. 2011 jyly joba bıýdjetiniń 50 paıyzy jumsaldy. Osyny eskere otyryp, «Qazaqstan Respýblıkasynyń densaýlyq saqtaý sektoryndaǵy tehnologııalardy berý jáne ınstıtýtsıonaldyq reforma júrgizý jónindegi jobasyn» 2015 jyldyń aıaǵyna deıin uzartý týraly sheshim qabyldandy», - deıdi B.Tókejanov.