Qazaqstannyń Densaýlyq saqtaý mınıstrligi Saýd Arabııasyna barýdan tartyna turýdy usynady
ASTANA. 25 qyrkúıek. QazAqparat - Qazaqstan Respýblıkasynyń Densaýlyq saqtaý mınıstrligi jańa koronavırýstyń áserinen bolǵan taıaýshyǵys respıratorlyq sındrom (MERS-CoV) aýrýynyń respýblıka aýmaǵynda tirkelmegendigin habarlaıdy.
Dúnıejúzilik densaýlyq saqtaý uıymynyń resmı málimdemesine sáıkes, búgingi kúni álemde aýrýdyń 130 laboratorlyq dáleldengen faktisi tirkelip, olardyń 58-y ólimmen aıaqtalǵan, dep habarlady Densaýlyq saqtaý mınıstrliginiń baspasóz qyzmetinen.
Bul jaǵdaılar kelesi Taıaý Shyǵys elderinde tirkeldi: Iordanııada, Katarda, Birikken Arab Ámirlikterinde (BAÁ) jáne Saýd Arabııasynyń Koroldiginde (SAK). Jekelegen dáleldengen jaǵdaılar Italııada, Ulybrıtanııada, Soltústik Irlandııada, Týnıste jáne Frantsııada anyqtaldy.
Densaýlyq saqtaý mınıstrligi ústimizdegi jylǵy qazan aıynda biraz adamdardyń qajylyqqa baratynyn eskere otyryp, múmkindiginshe Saýd Arabııasyna sapardy toqtata turýdy usynady.
Taıaý Shyǵys elderine baratyn adamdarǵa aldyn alýdyń birinshi kezekti sharalaryn ustaný qajet, atap aıtqanda aýrý adamdardan qashqaqtaý, kópshilik jınalǵan jerde bir ret paıdalanylatyn betperde paıdalaný, qoldy jıi jýý, las qoldy kózge, muryn men aýyzǵa tıgizbeý, tek býtıldegi sýdy paıdalaný.
Sondaı-aq QR Densaýlyq saqtaý mınıstrligi Taıaý Shyǵys elderinen oralǵan adamdarǵa respıratorlyq aýrý belgileri baıqalǵan jaǵdaıda keshiktirmeı dárigerge qaralýdy usynady.
