Qazaqstannyń demokratııalyq tamyry tereńdeı tústi - AQSh baıqaýshylary
ASTANA. 4 sáýir. QazAqparat /Jasulan Amanbaıuly/ - AQSh baıqaýshylary mıssııasynyń ókilderi QR Prezıdentiniń kezekten tys saılaýy Qazaqstannyń demokratııalyq tamyryn tereńdete tústi dep málimdedi.
AQSh delegattary Qaraǵandy, Aqmola, Pavlodar, Almaty oblystarynda jáne Astana men Almaty qalalaryndaǵy 65-ke tarta saılaý ýchaskesiniń jumysyn baqylady. Naýqan kezinde olar júzdegen adamnan saýalnama júrgizdi. «30 naýryz ben 3 sáýir aralyǵynda bizdiń delegatsııa 9 saıası partııanyń kóshbasshylarymen jáne olardyń ókilderimen, saılaý komıssııasynyń múshelerimen, ÚEU jetekshilerimen kezdestik»,-dedi Salyq jáne ınvestıtsııalar jónindegi halyqaralyq ortalyqtyń prezıdenti Denıel Alan Vıtt Astanada ótken brıfıngte.
«Bunyń aldynda ótkizilgen saılaýlarmen salystyrǵanda bıyl saılaý ýchaskelerine daýys berýshilerdi mobılızatsııalaýdyń ortalyqtanǵan nemese ákimshilik nyshandary bolǵan joq» degen ol, «3 sáýirdegi saılaýdan keıin Qazaqstannyń demokratııalyq tamyry tereńdeı tústi», - dep málimdedi.
Onyń aıtýynsha, saılaý halyqtyń saıası tańdaýyn anyq ańǵartady. Saılaýdyń úderisi de ashyq jaǵdaıda ótkizildi. «Jaqyn jyldary Qazaqstanda plıýralısttik Parlamentti qurýǵa jol ashyq dep baǵalaımyz»,-dedi D. Vıtt.
«Bizdiń top saılaý nátıjesi Qazaqstan halqynyń erkin, yqtııaryn bildirip otyr dep esepteıdi»,-dep atap kórsetti ol sóz sońynda.
