Qazaqstannyń dárilik preparattary qandaı elderge eksporttalady
NUR-SULTAN. QazAqparat – 2020 jyly pandemııa kezinde eldiń ishki naryǵyn farmatsevtıkalyq ónimdermen qamtamasyz etý máselesi ótkir boldy. Osyny eskere otyryp otandyq óndirýshiler 2020 jyldyń qorytyndysy boıynsha saladaǵy óndiris kólemin 47%-ǵa ósirgen, dep habarlaıdy QazAqparat tilshisi Úkimettiń baspasóz qyzmetine silteme jasap.
«Buǵan otandyq kásiporyndarda shyǵarylatyn ónim kóleminiń ulǵaıýy sebep boldy. Budan basqa kórsetkishterdiń ósýine «SQ-Farmatsııa» biryńǵaı dıstrıbıýtory arqyly tegin medıtsınalyq kómektiń kepildik berilgen kólemi sheńberinde dárilik zattardy jetkizýdiń ulǵaıýy, dárilik zattar men medıtsınalyq buıymdarǵa halyqtyń joǵary suranysyna baılanysty bólshek saýdada ótkizýdiń ulǵaıýy muryndyq bolǵan», - delingen habarlamada.
Máselen, «Hımfarm» AQ shyǵaratyn ónim kólemi 2 esege artqan. Sonymen qatar kompanııa keıingi 2 jylda eksport kólemin 2,5 ese arttyrdy. Búgingi tańda kásiporynnyń dárilik preparattary Ortalyq Azııa jáne EAEO naryqtarynda keńinen suranysqa ıe. Sondaı-aq, ónimder Qyrǵyzstan, Tájikstan, Túrikmenstan, Mońǵolııa jáne Reseı sııaqty elderge eksporttalady. Bıyl Ózbekstan naryǵyna shyǵý arqyly eksportty eki esege arttyrý josparlanýda.
Sondaı-aq mańyzdy syn-tegeýrinderdiń biri — Eýropalyq Odaqtyń dári-dármek naryǵyna shyǵý. Osylaısha, 2023 jylǵa qaraı eksport kólemin 16 mlrd teńgege deıin ulǵaıtý josparlanǵan. Búgingi tańda kásiporyn qorjynynda 11 óndiristik jelide óndiriletin 9 túrli formadaǵy 120-dan astam dári-dármek ataýy bar.
