Qazaqstannyń dári-dármekten ımportqa táýeldiligi 70 paıyzdy qurap otyr - S. Qaıyrbekova
ASTANA. QazAqparat - Qazaqstannyń dári-dármekten ımportqa táýeldiligi 70 paıyzdy qurap otyr. Búgin Úkimet otyrysyna arnalǵan Ortalyq kommýnıkatsııalar qyzmetindegi brıfıngte Densaýlyq saqtaý mınıstri Salıdat Qaıyrbekova osylaı málim etti.
«Qazirgi tańda elimizdiń normatıvtik salasynda medıtsınalyq ónimder aınalymy Eýropa qaýymdastyǵynyń standarttaryna barynsha jaqyndatylǵan. Bul neni bildiredi? Bul - elimizdiń dárilik zattar aınalymy salasynda durys ári qatań quqyqtyq retteý júrip jatyr degen sóz. Toqtala ketetin jaıt, bundaı shara TMD keńistiginde Qazaqstan men Ýkraınada ǵana qolǵa alynǵan», - deıdi mınıstr Salıdat Qaıyrbekova.
Onyń aıtýynsha, Qazaqstanda medıtsınalyq ónimdi shyǵarýshydan tutynýshyǵa jetkizilgenge deıin onyń sapasy baqylanady, tıimdiligi men qaýipsizdigi de baǵalanady. Sondyqtan da, búgingi tańda elimizde tıisti tájirıbeler engizilýde. «Tájirıbeler sol óndiristiń ózinen bastalady jáne zerthanalyq tájirıbeler, sonymen qatar, dárilerdiń dárihanalardaǵy bólshek saýdaǵa túsý tájirıbesi de engizilip jatyr. Minekı, osyndaı baqylaýdyń nátıjesinde, sońǵy úsh jylda elimizge tirkelýge ákelingen 1,5 myńǵa tarta dárilik zattardyń qaýipsizdik pen tıimdiligi dáleldengen joq. Bul tirkelgen jalpy preparattar sanynyń besten bir bóliginiń tirkeýden ótpegenin bildiredi. Sonymen qatar, dárilik zattardyń 1 mln. 300 myń oramnan turatyn 97 partııasy, onyń ishinde 11 myń keli sýbstantsııalar qaýipsizdik pen sapalyq baǵalaýdan ótpeı qaldy. Osynyń ózi Qazaqstandaǵy dári-dármek naryǵynyń jetkilikti deńgeıde qadaǵalanyp turǵanyn bildiredi», - dedi S. Qaıyrbekova.
