Qazaqstannyń dári-dármek naryǵyna Qytaıdan úlken qaýip tónip tur - DSM
ASTANA. QazAqparat - Qazaqstanǵa jalǵan dárilerdiń basym bóligi Qytaıdan kelip jatyr. Búgin Úkimet otyrysyna arnalǵan Ortalyq kommýnıkatsııalar qyzmetindegi brıfıngte Densaýlyq saqtaý mınıstri Salıdat Qaıyrbekova osylaı málim etti.
Mınıstrdiń sózine qaraǵanda, álemde jalǵan dáriler aınalymy artyp keledi. Máselen, AQSh-tyń azyq-túlik ónimderi men dárilik preparattardy baqylaý jónindegi basqarmasynyń derekteri boıynsha jalǵan dárilerdiń álemdik aınalymy 75 mlrd. AQSh dollaryn quraıdy. Al Eýropada sońǵy jyldary 7 mln-nan astam jalǵan farmatsevtıkalyq ónimderdi tárkilengen.
«Jalǵan dárilik zattar aınalymynyń 51 paıyzy Azııa elderine tıesili. Al Qazaqstannyń farmatsevtıkalyq naryǵyna Qytaımen geografııalyq kórshiligimiz úlken qaýip bolyp otyr. Óıtkeni, kontrafaktili dárilerdiń basym bóligi osy elden jetkiziledi», - deıdi mınıstr Salıdat Qaıyrbekova.
Onyń aıtýynsha, Qazaqstannyń ımportqa táýeldiligi de mundaı jalǵan dárilerdiń el naryǵyna enýine jaǵdaı jasaýda.
