Qazaqstannyń dańqty balýany Saılaý Muqashev ómirden ozdy
ORAL. QazAqparat - Qazaqstandyq dańqty balýan Saılaý Muqashev ómirden ozdy, dep habarlaıdy QazAqparat tilshisi.
Erkin kúres sheberi Saılaý Muqashev Keńes Odaǵy tusynda kóptegen tabystarǵa qol jetkizdi.
1950 jyly 1 jeltoqsanda burynǵy Chapaev aýdany Lenın atyndaǵy kolhozda dúnıege kelgen Saılaý Muqashev jasynan dombyra úırenip, án-jyrǵa qumar bolyp ósti. Degenmen Pervomaı orta mektebiniń 9-synybynda oqyp júrgende, aýylǵa kelgen sol kezdegi jas maman, keıin Qazaqstannyń eńbek sińirgen jattyqtyrýshysy atanǵan Qamesh Ismaǵulovtyń kózine túsip, kúreske bet burdy.
Mektep bitirip, Pavlodar ındýstrııalyq ınstıtýtyna túsken jas jigit Qazaqstannyń eńbek sińirgen jattyqtyrýshysy Luǵat Óteshevtiń qolastynda jattyqty. Asa jeńil salmaqta kúresip, 1970 jyly eresekter arasynda Qazaqstan chempıony atanǵan Saılaý Muqashev búkilodaqtyq jarystarda da top jara bastady. Ásirese, 1973 jáne 1974 jyldary kishi álem chempıonatymen teń sanalatyn Álı Álıev atyndaǵy halyqaralyq jarystyń eki márte jeńimpazy atandy. KSRO chempıonatynyń qola júldegeri (1973) atanýmen birge búkilodaqtyq jazǵy aýyl oıyndarynda birneshe dúrkin eshkimge jeńistik bermedi.
Ataqty balýandar Ábilseıit Aıhanov, Amanjol Buǵybaevtarmen birge júrgen Saılaý Muqashevqa da KSRO quramasynyń bapkerleri qyryn qarap, ony KSRO - Iran, KSRO - AQSh, KSRO - Úndistan básekelerine qatystyrǵanymen, álem, Eýropa chempıonaty syndy iri jarystarǵa aparmady. Al sol sheteldegi túrli jarystardan jeńip kelgenderdiń talaıyn S.Muqashev utyp júrdi. Kúrestiń professory atanǵan A.Buǵybaev osyndaı qoldan jasalǵan kedergilerdiń kesirinen álem chempıony bola almady. Odaq bapkerlerinen qaǵajý kórip, shettetilgen Saılaý Muqashevtiń eki ret Tájikstan chempıony atanǵany da bar.
1979 jyly Almaty dene shynyqtyrý ınstıtýtyn támamdaǵannan keıin Oralǵa oralǵan Saılaý Muqashev Batys Qazaqstan aýyl sharýashylyǵy ınstıtýtynda bapkerlik qyzmet atqaryp, kóptegen shákirtter tárbıeledi.
Sońǵy jyldary Saılaý Muqashevtiń júldesi erkin kúresten respýblıkalyq týrnır uıymdastyrylyp keledi.
Saılaý Muqashev týraly ocherk 1996 jyly jaryq kórgen «Qazaq balýandary» atty tarıhı-derekti basylymǵa engizildi.
Uzaqqa sozylǵan aýyr naýqastan keıin sport maıtalmany 25 maýsym kúni dúnıe saldy.
Kúres áleminde artynda óshpesteı iz qaldyrǵan marqum 27 maýsym kúni jerlenedi.
