Qazaqstannyń damýyna eńbegimizdi, bilimimizdi, qajyr-qaıratymyzdy jumsadyq - Saparbaev
Aqtóbe oblysynda Táýelsizdik kúnine oraı «Táýelsizdik túletken Máńgilik el» atty saltanatty shara ótti. El damýy men birligi úshin eńbek etip júrgen aqtóbelikterdiń bári Óner ortalyǵyna jınalyp, olardy oblys ákimi Berdibek Saparbaev quttyqtady. Óńir basshysy 26 jyl buryn ata-babamyz ańsaǵan táýelsizdikke qol jetkizip, búginde álem aldynda Qazaqstannyń abyroıy, bedeli, tanymaldylyǵy erekshe artqanyn atap ótti.
«Eń negizgi saıasat - memlekettiń gúldenýi, turaqtylyq, qaýipsizdik, halqymyzdyń turmysy, ál-aýqatynyń jaqsarýy. Qandaı da bir daǵdarysqa qaramastan Qazaqstan ekonomıkasy tómendegen emes, jalaqy, zeınetaqy kólemi tómendegen joq. Qurylys toqtamady. Bul jetistikterde aqtóbelikterdiń de úlesi bar. 2017 jylda da ósim bar. Memleket basshysy Nursultan Nazarbaev bergen tapsyrma oryndalyp jatyr. Ekonomıkanyń damý qarqyny ótken jylmen salystyrǵanda 5 paıyzǵa artty»,- dedi óńir basshysy Berdibek Saparbaev.
Oblys ákiminiń aıtýynsha, bıyl Aqtóbede ónerkásip ónimi 2 trıllıon teńgeni qurady. Aqtóbe rels-arqalyq zaýyty, Aqtóbe ferroqorytpa zaýytynyń №4 tsehy men Jańajol gaz óńdeý zaýytynyń tolyq qýattylyqta jumys isteýi ónerkásip óniminiń ósimine septigin tıgizdi. «Batys Qytaı - Batys Eýropa» jolynyń qurylysy aıaqtalyp, «Aqtóbe-Atyraý-Astrahan» jolynyń qurylysy bastaldy. Keler jyly Ortalyq-Batys tasjoly salynady. Bıyl óńirge 450 mıllıard teńge ınvestıtsııa tartyldy. Al memlekettik-jekeshelik seriktestik aıasynda 125 joba iske asyrylyp jatyr. Aıta keteıik, saltanatty shara kezinde Aqtóbe qalalyq máslıhatynyń hatshysy Sulýpan Shyntasovaǵa jáne «InterStıl» JShS dırektory Gnel Sarıbekıange «Parasat» ordeni berildi. Sonymen qatar, «ROKOS» kompanııalar tobynyń bas dırektory Arkadıı Nı ІІ dárejeli «Dostyq» ordenin aldy. Al 14 aqtóbelikke «Qurmet» ordeni tabys etildi. Olardyń arasynda iri sharýashylyq basshylary, aýdan ákimi, ákim orynbasarlary bar. Munaıshylar men kenshiler ІІІ dárejeli «Eńbek dańqy» ordenin aldy. «Aqtóbe qutty meken bolýy kerek. Ol úshin aqtóbelikter óńirdiń damýyna óz úlesin qosýy kerek. Tańerteńnen keshke deıin memleket bere bersin dep aıtpaı, árbir aqtóbelik, qazaqstandyq úles qosyp, eńbek etýi tıis. Qoldap, kómektesip júrgen azamattarǵa rahmet aıtamyn», - dedi Aqtóbe oblysynyń ákimi B.Saparbaev. 
