Qazaqstannyń damý joly naqty ǵylymı negizge súıenip jasalǵan - sarapshy
ASTANA. QazAqparat - QR Prezıdentiniń 30 qarashada jarııalaǵan Joldaýynda usynylǵan Qazaqstannyń damý joly naqty ǵylymı negizge súıenip jasalǵan. Búgin QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda Qoǵamdyq-saıası úrdister saraptamalyq-jobalaý bıýrosynyń dırektory Orazǵalı Selteev osyndaı pikir bildirdi.
«QR Prezıdentiniń 30 qarashada jarııalaǵan Joldaýy Qazaqstannyń damý joly naqty ǵylymı negizge ıe ekendigin dáleldedi. Joldaý bizdiń negizgi tujyrymdamalyq kontseptsııalarǵa: «Qazaqstan-2050» Strategııasy», Máńgilik el» patrıottyq ıdeıasy, «Nurly jol» ınfraqurylymdyq damý baǵdarlamasy, «100 naqty qadam» Ult Jospary jáne «Jalpyǵa ortaq eńbek qoǵamy» tujyrymdamalaryna saı keledi. Osy baǵdarlamalardyń baǵytymen bizdiń memleket te damyp keledi. Bul baǵdarlamalardyń basym ustanymdary Elbasynyń tapsyrmalarymen bekitilgen», - dep atap ótti sarapshy.
Onyń oıynsha, Joldaýdyń negizgi taqyryby - álemdik daǵdarystyń yqpaly men onyń teris úrdisterine qarsy turý. «Eger Memleket Basshysy usynǵan bastamalarǵa, sheshimderge muqııat qaraıtyn bolsaq, jahandyq daǵdarys - biz úshin naryqtyq ekonomıkadaǵy damýymyzdyń jańa kezeńi bolyp tabylady. Daǵdarysqa qarsy saıasat ekonomıkany basqarýdyń naqyt ǵylymı sheshimderine súıengen», - deıdi O. Selteev.
