Qazaqstannyń Damý banki dollarmen qorlandyrýdan tolyqtaı bas tartpaq
ASTANA. QazAqparat - Qazaqstannyń Damý banki dollarmen qorlandyrýdan tolyqtaı bas tartpaq. Bul týraly «KTK» telearnasynyń «Halyq qyzmetshisi» baǵdarlamasynda qonaqta bolǵan «Báıterek» holdınginiń basshysy Qýandyq Bıshimbaev málim etti.
«Qazaqstannyń Damý banki ári qaraı damýdyń durys pozıtsııasyn qurý úshin biz dollarmen qorlandyrýdan tolyqtaı bas tartýdy kózdep otyrmyz. Biz eshqashan dollarmen qaryz alatyn, dollarmen nesıe beretin úzdik bank bolmaımyz, óıtkeni bul sheteldik bankterdiń enshisinde. Al teńgeden, ulttyq valıýtamyzdan biz birinshi bolýymyz kerek , bolamyz da», - dedi Q. Bıshimbaev.
Q.Bıshimbaevtyń pikirinshe, «QDB Ulttyq bankten keıin teńgeden eń úzdik bank bolýy tıis», qaryzdy eń uzaq merzimge berip, nesıeni eń jaqsy stavkamen berýi tıis. «Ókinishke oraı, Damý bankiniń qazirgi úlgisi oıdaǵydaı qurylmaǵan. Resýrstardyń kóbisi shetelden dollarlyq balamada alynyp, ekonomıka da dollarmen nesıelendirildi. Devalvatsııa jaǵdaıynda dollarmen qaryz alyp, al tabysty teńgemen tapqandar qazir qıyn jaǵdaıdaǵa tap bolǵanyna kýá bolyp otyrmyz», - dep qorytyndylady Q. Bıshimbaev.
