Qazaqstannyń dámhana men qonaqúı ıeleri temeki shegýge arnalǵan oryndarǵa tyıym salynýyna narazy
ASTANA. QazAqparat - Qazaqstannyń qoǵamdyq tamaqtaný oryndary men qonaq úıleri qojaıyndary temeki shegýge arnalǵan oryndarǵa tyıym salynýyna narazy. Bul týraly búgin «HoReCa Qazaqstan» ulttyq qaýymdastyǵynyń prezıdenti Igor Kopaılov málim etti.
Onyń atap ótýinshe, qazirgi tańda Májilis depýtattary «Halyq densaýlyǵy jáne densaýlyq saqtaý júıesi týraly» kodekske engiziletin ózgertýlerdi talqylaýda. Onda kópshilik jınalatyn jerlerde shylym tartýǵa arnalǵan arnaıy oryndarǵa tyıym salý týraly talap bar. Bul talap kodekske engizilgen jaǵdaıda qoǵamdyq tamaqtaný oryndary men qonaq úılerdiń tabysy azaıyp, jumys oryndarynyń qysqarylýy múmkin. «Zań shyǵarýshylar zań buzýshylyqtardyń kóbeıýine sanaly túrde negiz qalap otyr. Meıramhana, dámhanalar men qonaq úılerdegi temeki shegýge arnalǵan oryndardy alyp tastaýǵa májbúrlegen jaǵdaıda kún saıyn tyıym salynǵan jerlerde 30 mln-ǵa jýyq temeki zańsyz shegiledi», - dedi ol. I.Kopaılovtyń sózine qaraǵanda, temeki shegýge arnalǵan oryndarǵa tyıym salý tájirıbesi batystyń birqatar elderinde qoldanylyp, biraq tıisti nátıje bermegen. Buǵan qosa, meıramhanalarǵa kelýshilerdiń sany 30 paıyzǵa qysqarǵan.
