Qazaqstannyń da ımperııalyq tarıhy bar - tarıhshy J. Artyqbaev
ASTANA. 14 maýsym. QazAqparat - Bizdiń de ımperııalyq tarıhymyz bar. Ol týraly ashyq aıtý qajet. Astanada «Amanat» pikirsaıys klýbynyń uıymdastyrýymen ótken «Ulttyq tarıhty zerdeleý» taqyrybyndaǵy májiliste L. Gýmılev atyndaǵy EUÝ-diń professory, tarıh ǵylymdarynyń doktory, tarıhshy-etnograf Jambyl Artyqbaev osylaı aıtty.
Ǵalym atap kórsetkendeı, qazirgi kezde tatar halqynyń tarıhshy-etnograftary ulttyq tarıhqa erekshe den qoıyp keledi. «Olar Reseıdiń qol astynda otyrsa da, Altyn Orda jáne Bulǵar tarıhyn barynsha paıdalanyp, ekeýin de baýyryna basyp alǵan. Biz de Altyn Ordanyń shapanynan shyqqan elderdiń birimiz ǵoı. Máselen, Altyn Ordanyń sońǵy ári iri handarynyń biri - Ormambet hannyń (Orys han - avt.) stavkasy mynaý turǵan Esildiń boıynda, Atbasardyń arǵy jaǵynda boldy. Altyn Ordanyń úlken bir ortalyǵy - Ulytaýdaǵy Joshy ordasy. Ekibastuzǵa jaqyn jerde Shaıban sultandarynyń ortalyǵy bar. Mine, bunyń ózi - ǵajaıyp tarıh. Búginde bizdiń de ózimizdiń ımperııalyq tarıhymyzdyń baryn ashyq aıtý qajet. Olaı bolmasa, bodandyq dáýirinen shyǵa almaımyz», - deıdi J. Artyqbaev.
