Qazaqstannyń tsıfrlandyrýǵa mańyz berýi quptarlyq shara - «NOKIA» vıtse-prezıdenti
ASTANA. QazAqparat - NOKIA Europe-niń aǵa vıtse-prezıdenti Markýs Borhert Qazaqstannyń sandyq júıege ótip jatqanyna qatysty pikir bildirdi, dep habarlaıdy «QazAqparat» HAA tilshisi.
Sheteldik meıman Astanada «Qazaqstannyń ónerkásiptik saıasaty: eńbek ónimdiligin arttyrý arqyly kásiporyndardyń básekege qabilettiligin arttyrý» atty forýmǵa arnaıy shaqyrylǵan. Forým barysynda ındýstrııa 4.0 elementteri bolyp tabylatyn tsıfrlik tehnologııalardy ázirleý jáne qoldanysqa engizýge qatysty bıznesti qoldaý boıynsha suraqtar talqylandy.
«Tsıfrlandyrý aıasynda bul forýmnyń mańyzy óte zor. Sandyq júıege ótýdi jan-jaqty talqylaýdyń mańyzy barshylyq. Meniń ózim Vladıvostoktan Lıssabonǵa deıingi kompanııa taýarynyń naryqtaǵy aınalymyna jaýaptymyn. Tsıfrlandyrý júıesi degenimiz - zamannyń jańa talabyn, jumys júrgizý tártibin qabyldaý. NOKIA kompanııasynda munyń ne ekenin óte jaqsy túsinedi. NOKIA óz kezeginde sońǵy jyldary bul baǵytta birneshe reforma júrgizdi. Ózderińiz biletindeı, osydan 10-15 jyl buryn uıaly telefondardy shyǵarýda NOKIA kompanııasy kóshbasshy bolatyn. Qazirgi kúni de ozyq tehnologııalar men tsıfrlyq ınfraqurylym boıynsha jer jahandaǵy negizgi kompanııalardyń biri», - deıdi ol.
Markýs Borherttiń aıtýynsha, tsıfrlandyrý arqyly Qazaqstan úshin keremet múmkindik týyp otyr.
«Shyny kerek, biz qazirgi ýaqytta ındýstrııalyq tóńkeristiń tabaldyryǵynda turmyz. Alǵashqy ındýstrııalyq tóńkeris qozǵaltqyshtarǵa, keıin kele hımııa men telekommýnıkatsııaǵa baılanysty bolsa, budan keıin ınternet pen mobıldik qosymshalar dúnıege keldi. Búgingi tańda óndiristik tóńkeristiń tórtinshi kezeńi ótip jatyr. Adamdar men kólikterdiń qyzmeti birigip, bári de avtomattandyryla túsedi. Zaýyttar budan da joǵary ónim óndirip, qaýipsizdigi arta túsedi. Indýstrııadaǵy basty jetistikterdiń taǵy biri - naryqqa 5G keledi. Naqty naryqtyń osy zańyna beıimdele alýy nemese almaýy álemdik kompanııalar men memleketterdiń jahandyq básekege qabileti bar-joǵyn anyqtap beredi. Osylaısha, bul tóńkeris jeńimpazdar men jeńilgenderdi anyqtaıdy. Búgingi tańda álemdegi TOP-1000 kompanııa aldaǵy 10 jylda múlde joǵalyp ketedi dep kútilip otyr. Onyń ornyna eń myqty degen 400 kompanııa ómirge keledi. Olardyń nesheýi Qazaqstanda qurylady? Eger bári de oıdaǵydaı iske asyrylsa, paıdaly qazbalarǵa baı Qazaqstannyń ekonomıkasyn tsıfrlandyrý adamdardyń ómir sapasyn arttyrýǵa muryndyq bolary sózsiz», - deıdi ol.
Markýs Borhert óz sózinde búgingi kúni Eýropa óz áleýetinen tómen deńgeıde jumys aqtaryp jatqanyn aıtady. Eger Eýropanyń ishki jalpy ónimine 2025 jylǵa qaraı 2,5-3 trıllıon eýro salyp jiberse, odan keıingi ІJÓ jylyna 1 protsentke artatyn bolady. Sonymen qatar, Eýrazııalyq ekonomıkalyq odaq aıasynda da oǵan múshe elderdiń ІJÓ-si 20 protsentke ósýi múmkin.
«Qazaqstan úshin tsıfrlandyrý salasynda kóshbasshyǵa aınalýdyń joldary qandaı? Eń aldymen, baılanys, telekommýnıkatsııa osy salanyń «júreginde» ornalasqanyn uǵý kerek. Tsıfrlyq magıstarldardyń mańyzy zor. Bul turǵyda tsıfrlyq beıimdelýdiń de rólin erekshe atap ótkim keledi. Onyń júzege asyrylýy sol eldiń saıası áreketterine baılanysty iske asyrylady. Sondyqtan, Qazaqstannyń barlyq salada tsıfrlandyrýǵa basa mańyz berip otyrǵanyn barynsha qoldaımyz. Bul álemniń eki bóligin - Eýropa men Azııany baılanystyrýǵa septigin tıgizedi», - dedi ol.
