Qazaqstannyń BUU-ǵa músheliginiń 30 jyldyǵyna oraı estelik poshta markasy shyǵaryldy

ASTANA. QazAqparat – Búgin Qazaqstan Respýblıkasynyń aýmaǵynda «Qazaqstan Respýblıkasynyń Birikken Ulttar Uıymyna múshe bolýynyń 30 jyldyǵyna» oraı «Estelik jáne mereıtoılyq kúnder» serııasynyń arnaıy poshtalyq markasy aınalymǵa engizildi, dep habarlaıdy QazAqparat.

Markany «Qazposhta» AQ BUU-nyń Qazaqstandaǵy Ókildigi jáne Qazaqstan Respýblıkasynyń Syrtqy ister mınıstrligimen birlesip shyǵarǵan.

«Bizdiń kompanııa Qazaqstannyń BUU-ǵa músheliginiń 30 jyldyǵy sııaqty aıtýly oqıǵanyń qurmetine estelik poshta markasyn aınalymǵa shyǵarýǵa qýanyshty. Osy marka elimizdiń álemdik qaýymdastyqtaǵy róliniń tamasha dáleli bolady dep oılaımyn. Bıyl «Estelik jáne mereıtoılyq kúnder» serııasy aıasynda Qazposhta Qazaqstannyń ıÝNESKO, AÓSShK sııaqty halyqaralyq uıymdarǵa músheliginiń 30 jyldyǵyna jáne Qazaqstannyń Materıaldyq emes murany saqtaý týraly konventsııaǵa qosylýynyń 10 jyldyǵyna arnalǵan markalar shyǵardy. Sonymen qatar elimizde poshta aınalymynda BUU-nyń 50 jáne 60 jyldyǵyna oraı shyǵarylǵan markalar qoldanylady», - dedi «Qazposhta» AQ basqarma tóraǵasy Ásel Janasova.

Ólshemi 26 h 29,6 mm poshta markasy 10 000 dana taralymmen shyǵaryldy. Marka paraǵy 8 markadan turady. Paraq ólshemi 135 x 70 mm. Poshta markasynyń nomınaly – 700 teńge. Markalar ýltrakúlgin boıaýmen jáne lakpen qorǵalǵan. Sýretshisi – Elnara Baınazarova.

BUU-nyń Qazaqstandaǵy basshysy Mıkaela Frıberg-Storı: «Marka keskindemesiniń negizi retinde dombyranyń tańdalýy kezdeısoq emes, óıtkeni qazaqtyń dástúrli dombyra kúıi ıÝNESKO Materıaldyq emes mádenı muranyń reprezentatıvti tizimine engizilgen. Biz Qazaqstannyń osy otyz jyl ishinde turaqty damý jónindegi is-áreketin quptaımyz. Estelik poshta markasynyń shyǵarylymy Qazaqstannyń syrtqy saıasaty tarıhyndaǵy mańyzdy beles jáne turaqty damý maqsattaryna beıimdigi týraly qoǵam habardarlyǵyn arttyrýdyń belgisi bolyp tabylady», - dep atap ótti.

Birikken Ulttar Uıymy damýdyń bolashaq josparlary men Úkimettiń turaqty damýǵa degen qarqyndy umtylysy týraly kózqarasty damytý úshin Qazaqstanǵa arnalǵan qoldaýyn tereńdetýde. BUU-nyń Qazaqstandaǵy júıesi qundylyqtarǵa, adam quqyqtaryna negizdelgen senimdi seriktes bolyp qala beredi. Uıym jumysy memleket pen qoǵamdaǵy seriktesterge basqarýdyń eń qajetti keńesterin, tehnıkalyq kómek pen ǵalamdyq jelilerge qol jetkizýge baǵyttalǵan.

Foto: kazpost.kz