Qazaqstannyń BUU-daǵy turaqty ókili Qaırat Omarov: Qaýipsizdik Keńesine tóraǵalyq - memleket úshin úlken jaýapkershilik
- Qaırat Ermekuly, Qazaqstan BUU Qaýipsizdik Keńesiniń turaqty emes múshesi retindegi alǵashqy jylyn aıaqtady. Osy bir jyldyq kezeń Qazaqstannyń syrtqy saıasaty úshin úshin nesimen este qalmaq?
-Este qalatyn oqıǵalar kóp, árıne. Eń aldymen BUU Qaýipsizdik Keńesi deńgeıinde qyzmetke kirisken Qazaqstan kóptegen elder men halyqtardyń taǵdyry úshin joǵary jaýapkershilikti sezinýdi bastan ótkerdi. Birshama pafos sekildi estilýi múmkin, alaıda jahandyq turaqtylyqqa ǵana emes, memleketterdiń qaýipsizdigimen qatar, qarapaıym adamdardyń taǵdyryn sheshetin mańyzdy sheshimder qabyldanatyn protsesske aralasyp otyrmyz, osyny sezingen saıyn, aldaǵy áreketterdiń asa mańyzdy ári aıqyn bolýy kerektigin oıyńa túıe túsesiń.
Óıtkeni, munda qatelesýge quqymyz joq. Qate, asyǵys qabyldanatyn árbir sheshimniń artynda halyqtar ómiri men adam taǵdyry tur. Menińshe, BUU Qaýipsizdik Keńesindegi ujymdyq jumystyń eń úlken motıvatsııasy da osy.
Jańa ǵana ótken jyldy nesimen erekshelenedi degenge kelsek, keńeske múshe memleketter delegatsııalarynyń ózara árekettestikke toly qarbalastaryn, qyzý pikirtalastardy, daýlardy, syndarly sheshim izdestirý joldaryn aıtýǵa bolady. Árıne, naqty bir sheshimniń saıası múddeler úshin qurbandyqqa shalynatyn kezderi de kóńilge kirbiń uıalatatyn sátimen este qalyp jatyr. Mundaı oıyndar saldarynan túsinispeýshilik týyndap, senim joǵala túsetini anyq. Álbette, ondaı jaǵdaı jıi qaıtalanbaıdy, alaıda este qalatyny da osy.
Deı turǵanymen, elimiz úshin asa mańyzdysy - bul halyqaralyq qaýymdastyq tarapynan Qazaqstan men Memleket basshysyna, udaıy beıbitshilikti, turaqtylyq pen teńgerimdi sheshimdi jaqtaıtyn qazaqstandyq syrtqy saıasatqa syılastyq pen senimi joǵarylap keledi. Elimizdiń belsendi bitimgerlik áreketteri, Memleket basshysy aıqyndaǵan, teńquqyly jáne ózara tıimdi yntymaqtastyqqa negizdelgen elimizdiń syrtqy saıasatyndaǵy basymdyqtardy júzege asyrýdyń naqty qadamdary, halyqaralyq quqyqty qurmetteý, saqtaý, kez kelgen qaqtyǵystardy tek dıalog arqyly dıplomatııalyq jolmen sheshý jáne ózara tıidi sheshimder izdeý - osynyń bári Qaýipsizdik Keńesindegi áriptesterimizdi, sondaı-aq tutastaı BUU aıasyndaǵy baılanystarda Qazaqstanmen ózara árekettestikke tartymdy ete túsedi.
Aıta keterligi, BUU QK jumysyna kirispeı turyp, Qazaqstan óz qyzmetindegi basymdyqtardy aıqyndaǵan bolatyn. Munyń ózi biz úshin asa mańyzdy qadam boldy. Qazaqstannyń basymdyqtary Elbasy N.Nazarbaevtyń BUU Qaýipsizdik Keńesine saıası joldaýy aıasynda qalyptasqan bolatyn. «Qaýipsiz, ádil jáne órkenıetti álem qurý úshin jahandyq áriptestikti nyǵaıtýǵa qazaqstandyq tujyrymdamalyq kózqaras» atty joldaý byltyrǵy jyly 10 qańtarda Qaýipsizdik Keńesine usynylyp, resmı qujat mártebesin ıelendi. Elbasynyń saıası joldaýyndaǵy basymdyqtardy BUU QK áriptesterimiz qoldap, keńes qyzmetiniń negizgi baǵyty retinde de moıyndalǵan bolatyn.
- Qaýipsizdik Keńesi qyzmetine músheliktegi jumystyń jalpy qorytyndysyna da toqtalyp ótseńiz?
-Qaýipsizdik Keńesine turaqty emes múshe bolǵan bir jyl ishinde Qazaqstan Keńesiniń 270-ten astam resmı otyrysyna qatysty. Onyń ishinde 78 - ashyq rezolıýtsııalar men Tóraǵa málimdemelerin qabyldaýyna, 150 ashyq brıfıngter, 8 shekteýli pikirtalastarǵa, 17 ashyq pikirtalastarǵa qatystyq. Budan bólek, 126 resmı emes konsýltatsııalar men E-10 Toby (Qaýipsizdik Keńesiniń turaqty emes músheler birlestigi) atalatyn 12 kezdesýge aralastyq. Osynyń bári tek qazaqstandyq dıplomattardan ǵana emes, elimizdiń barlyq mınıstrlikteri men vedomstvolarynan qyzý jumysty talap etkeni sózsiz. BUU QK otyrystaryna dıplomattardan bólek, basqa da memlekettik organdar basshylary men ókilderi qatysty. Osyndaı otyrystar barysyndaǵy olardyń syndarly, progressıvti, teńgerimdi usynystary men bastamalary halyqaralyq áriptester tarapynan oń baǵalanǵanyn da atap ótkim keledi. Tutastaı alǵanda, qazaqstandyq delegatsııa BUU QK 50-den astam (onyń ishinde onnan astamyna birlesken avtorlyqta) rezolıýtsııasyn, QK tóraǵasynyń jıyrmadan astam málimdemelerin, basqa da qujattardy qabyldaýǵa óz úlesin qosty.
Qazaqstandyq dıplomattar QK mıssııasy quramynda Kolýmbııaǵa, Gaıtıge, Batys afrıkadaǵy Sahel aýdandaryna, Ortalyq Afrıkadaǵy Chad teńizine sarap shekti. Vashıngtonda AQSh Prezıdentimen, Memlekettik departament basshysymen, Kongress múshelerimen kezdesti, Afrıka odaǵynyń shtab-páterinde kelissózder ótkizýge qatysyp, terrorızmge qarsy jahandyq kúresti ilgeriletý aıasynda Sıngapýrde, Malaızııa men Aýǵanstanda boldy.
- Bundaı saparlardyń nátıjesi qandaı?
Qaýipsizdik Keńesiniń múshesi retinde problemaly óńirlerge jáne qaqtyǵystar aımaǵyna barýdyń paıdasy zor. Ondaı saparlar máseleni tereńirek túsinip, taldaýlar jasaýǵa, ol jerlerdegi qalyptasqan ahýaldy zerdeleýge kóp septigin tıgizedi. Sosyn ol aımaqtaǵy qaterlerge balamaly qorǵanys tetigin tıimdi qalyptastyryp, sondaı-aq Memleket basshysynyń bastamalary men basymdyqtaryna sáıkes, problemalardy sheshý joldaryn qarastyrýǵa jol ashatyny anyq.
Jalpy alǵanda, ótken jyl Qazaqstan úshin BUU-nyń asa mańyzdy organy sanalatyn Qaýipsizdik Keńesiniń jumystaryn belsendi zertteý baǵytyndaǵy tynymsyz jyl boldy dep aıtqym keledi. Biz osy jumys aıasynda beıbit álemdi qalyptastyrýǵa qatysty óz ıdeıalarymyzdy ilgeriletip kelemiz.
Qazaqstannyń BUU Qaýipsizdik Keńesine turaqty emes músheligin elimiz úshin ǵana emes tutastaı óńir úshin ózekti ári mańyzdy faktor retinde ataýǵa bolady. Áıtse de Qazaqstan QK aıasynda óńirlik problemalardyń sheshilýine, aımaqtaǵy turaqtylyq pen damýǵa qalaı kómek bere alady?
- Qazaqstan BUU tarıhynda Qaýipsizdik Keńesine engen Ortalyq Azııadaǵy tuńǵysh memleket ekenin eske sala keteıin. Sondyqtan da, QK múshesi retinde biz birinshi óńirdegi máselelerge erekshe nazar aýdaratyn bolamyz jáne Keńestiń áleýetin álemniń osynaý óńirine halyqaralyq qaýymdastyqtyń nazaryn aýdarýǵa paıdalanýǵa tyrystyq. Bul basymdyqty júzege asyrýda barlyq memleketterdiń múddeler úılesimdiligi negizge alynady. Bunymen qosa biz Aýǵanstanda beıbit ómirdiń tezirek ornyǵýyn, onyń óńirdegi basqa memlekettermen ekonomıkalyq ıntegratsııasy úshin jan-jaqty kótekter berilýin qoldaımyz. Sonyń ishinde ınfraqurylymdyq jáne kóliktik-tranzıttik damý, beıbitshilik pen qaýipsizdik qaterlerine qarsy turýdaǵy óńirlik áleýetterdi nyǵaıtý qajet dep sanaımyz. Osyǵan baılanysty Qazaqstan Aýǵanstandy tutastaı Ortalyq Azııa úshin tıimdi ekonomıkalyq áriptes retinde qarastyrýdy usynady.
Aıta keteıik, 2017 jyldyń 26-27 mamyrynda nıý-ıorktik alańda alǵash ret Ortalyq Azııa sarapshylarynyń konsýltatsııalary ótti, Ortalyq Azııa + Aýǵanstan aralas formatyndaǵy kezdesýler nátıjesinde BUU QK Tóraǵasynyń málimdeme jobasy ázirlendi. Onda Ortalyq Azııa óńirine Aýǵanstan terrıtorııasynda shoǵyrlanǵan halyqaralyq terrorıstik uıymdardyń destrýktıvti qyzmetinen týyndaıtyn qaterler jáne ondaı qaterlerdiń túpki sebepterin sheshý jolymen olardyń aldyn alý men eńserý máseleleri qamtyldy. Atap óterligi, qazaqstandyq delegatsııa Ortalyq Azııadaǵy jaǵdaı jáne Ortalyq Azııaǵa arnalǵan preventıvti dıplomatııa boıynsha BUU Óńirlik Ortalyǵynyń aǵymdaǵy máseleleri jónindegi 2017 jyldyń 3 aqpany men 27 maýsymyndaǵy BUU QK málimdemesiniń qabyldanýyna mańyzdy úles qosty.
Budan bólek, Qazaqstan Qaýipsizdik Keńesiniń aıasynda IGIL/DAISh jáne Ál Kaıda, Talıban, Somalı/Erıtree jónindegi úsh sanktsııalyq komıtetke tóraǵalyq etti. Ataýynan kórinip turǵanyndaı, bul komıtetter terrorızmmen kúres máselelerin qarastyrady. Osy rette bizge qazirgi tańda Qazaqstanǵa senimdiliktiń joǵary ekenin, halyqaralyq áriptesterdiń Qazaqstandy myqty, saıası oıynnan tysqary turatyn, Keńestiń teńgerimdi múshesi retinde qarastyratynyn atap ótedi. Osyndaı senimniń nátıjesinde biz ótken bir jyl ishinde Komıtet qyzmetine nátıjeli oń dınamıka bere aldyq dep sanaımyn. Bundaı jaǵdaıdyń ózi «medıator men ádil broker» retindegi bizdiń elimiz ben Elbasynyń oń ımpýlsi óńirlik kún tártibin halyqaralyq saıasatta ilgeriletýge aıtarlyqtaı septigin tıgizedi.
Rasynda da, QK men BUU músheleri sońǵy kezderi Qazaqstannyń belsendi pozıtsııasy arqasynda Ortalyq Azııanyń álem deńgeıinde kóbirek tanyla bastaǵanyn aıtady. Óńirdegi ıntegratsııalyq protsessterdiń qarqyndy damýy, Ortalyq Azııany damytýdyń pisip jetilgen kókeıtesti máselelerin sheshýge memleketterdiń belsendiligi de halyqaralyq qaýymdastyqtyń nazaryn aýdaryp otyr.
Tutastaı alǵanda, Qazaqstannyń BUU QK músheligi óńir úshin pozıtıvti faktor bolyp tabylady. Osy arqyly óńirdegi memleketter beıbitshilik pen qaýipsizdiktiń kún tártibindegi ózderiniń pozıtsııasyn meılinshe keńirek qamtylýyn málimdeı alatyn múmkindikke qol jetkizip otyr. Onyń ústine biz turaqtylyq pen qaýipsizdikti qamtamasyz etý baǵytynda barlyq Ortalyq Azııanyń ortaq múddelerine de nazar aýdaramyz. Bul rette Ortalyq Azııa men Aýǵanstanda jáne osyndaǵy barlyq memleketterdiń eskerilgen múddeleri negizinde beıbitshiliktiń, yntymaqtastyq pen damýdyń óńirlik aımaǵy modeli qalyptasady jáne synaqtan ótedi degen senimdemiz.
- Búgin ıaǵnı, 2018 qańtarynan bastap Qazaqstan Qaýipsizdik Keńesine tóraǵalyq etý mindetine kiristi. Tóraǵalyqtaǵy negizgi basymdyqtar qandaı bolmaq? Bul jumystyń negizgi protsedýralyq jaıttaryna toqtalsańyz?
- Iá, Qazaqstan tarıhta tuńǵysh ret BUU Qaýipsizdik Keńesine tóraǵalyq etip, onyń ýaqytyly otyrystary men resmı emes konsýltatsııalaryna jetekshilik jasaıtyn bolady. Dástúrge sáıkes, ár Tóraǵa qyzmetine kirisetin aı basynda Keńestiń sol kezeńdegi jumysynyń baǵdarlamasyn bekitedi, BUU barlyq músheleri úshin brıfıngter ótkizip, halyqaralyq BAQ-ty ol týraly aqparattandyrady. Tóraǵa sonymen qatar BUU múshe memleketterimen ekijaqty kezdesýder ótkizip, BUU negizgi organdary jáne arnaıy mekemeler basshylarymen, óńirlik jáne basqa da top tóraǵalarymen kezdesedi. Tóraǵanyń fýnktsııasyna Keńes kelisimimen jáne Keńes atynan málimdemeler jasaý, resmı emes konsýltatsııalar barysyndaǵy talqylaýlar qorytyndysy boıynsha press-brıfıngter uıymdastyrý, sondaı aq Qaýipsizdik Keńesi qandaı da bir mátindik nemese basqa da qujattarǵa kelisim jasaǵanda sol týraly málimdemeler jasaý kiredi. Tutastaı alǵanda Tóraǵa retinde Qazaqstan BUU Hatshylyǵynyń kómegimen Qaýipsizdik Keńesiniń kúndelikti jumysyn úzdiksiz qamtamasyz etpek.
Aıta keteıin, osy baǵytta 2017 jyldyń jeltoqsan aıynda BUU QK aldaǵy tóraǵasy retinde BUU Bas hatshysy Antonıý Gýterrıshpen, BUU Bas Assambleıasy Tóraǵasy Mıroslav Laıchakpen mindetti kezdesýlerim ótti. BUU qoldanystaǵy erejelerine sáıkes, bul kezdesýlerde BUU QK Tóraǵasy BUU basshylaryn Qaýipsizdik Keńesine tóraǵalyq etý jumysynyń baǵdarlamasymen tanystyrýy qajet. Budan bólek, Tóraǵa óz memleketi tarapynan usynylatyn taqyryptyq pikirtalastardyń taqyryptary men kúni týraly aqparattandyrýy tıis.
- Qazaqstan tarapynan usynylatyn taqyryptar aıqyn ba?
- Qazirgi kúni biz Elbasynyń qatysýymen ótetin «Jappaı qyryp-joıý qarýlaryn taratpaý jáne senim sharalary» taqyrybynda joǵary deńgeıli brıfıng ótkizýdi uıymdastyryp jpatyrmyz. Bul bizdiń tóraǵalyqtyń eń ózekti elementi bolmaq. Bul shara aıasynda ıadrolyq qarýdy taratýdyń aldyn alýǵa qatysty ózekti máseleler, senim arqyly beıbitshilikti saqtaý máseleleri talqylanady dep kútiledi. Aıta keteıin, osynyń ózi Memleket basshysynyń «Álem. HHІ ǵasyr» manıfestimen úılesedi.
Budan bólek, biz Ortalyq Azııa men Aýǵanstan boıynsha mınıstrlik deńgeıindegi pikirtalastar, Taıaý Shyǵys boıynsha toqsandyq pikirtalastar ótkizýdi josparlaımyz. Bul sharalar transparentti, sýbstantıvti, obektıvti jáne dıskýtsııanyń naqty nátıjelerine baǵyttalady dep úmittenemiz. Sosyn bul týraly Ashhabadtaǵy Ortalyq Azııaǵa arnalǵan preventıvti dıplomatııa boıynsha BUU Óńirlik Ortalyǵynyń qyzmeti jónindegi jabyq konsýltatsııalarda da aldyn ala aıtylyp otyrady. Atalǵan Óńirlik Ortalyq on jyl buryn Elbasynyń bastamasymen qurylǵanyn da eske sala keteıin.
Osyndaı joǵaryda aıtylǵan eki pikirtalastyń qorytyndysy boıynsha Qaýipsizdik Keńesiniń preventıvti dıplomatııa jáne qaterlerden beıbitshilikti saqtaý arqyly qaqtyǵyssyz álem qalyptastyrý boıynsha Ortalyq Azııa men Aýǵanstan úshin eki mańyzdy qujaty qabyldanady dep kútemiz. Budan bólek, bizdiń tóraǵalyqtyń kún tártibinde Afrıka qurlyǵyn qamtıtyn keń aýqymdaǵy máseleler engiziledi. Sırııa máseleleri (saıası, gýmanıtarlyq, hımııalyq trekter), Kıpr men Kolýmbııa problemalaryna jekelegen otyrystar arnalmaq. Al tóraǵalyqtan soń osy kezeńde qol jetkizilgen ýaǵdalastyqtardyń praktıkalyq ımplementatsııasyna nazar aýdaramyz.
- Degenmen, osy tóraǵalyq pen jalpy tutastaı BUU QK Qazaqstannyń múshelegi qanshalyqty mańyzdy ekenine toqtalyp ótseńiz?
- Buǵan deıin de atap ótkenimdeı, BUU Qaýipsizdik Keńesindegi tóraǵalyq pen jalpy múshelik aıasyndaǵy bizdiń múddemiz eń birinshi kezekte memleketimiz ben óńir úshin beıbit, turaqty jáne órkenıetti orta qurý bolyp tabylady. Biz - iri eýrazııalyq memleketpiz. Jahandyq geosaıası teketiresterdi aıtpaǵannyń ózinde óńirlik daǵdarystyń kez kelgeni, ıadrolyq qarýdy taratpaý problemalary nemese sanktsııalyq teketirester - osynyń báriniń salqyny bizdiń elimizge de tıedi. Álemdik ózgerister aıasynda Qazaqstan enjarlyq tanytyp, nemquraılylyqpen otyra almaıdy, ózgeristerdiń durys baǵyt alýy úshin tıimdi mámileger bolýǵa kúshimizdi jumsaıtyn bolamyz. Bul árbir jekelegen jaǵdaılarǵa da, sondaı-aq uzaqmerzimdi óńirlik qaýipsizdik ınstıtýttaryn qalyptastyrýǵa da qatysty.
BUU Qaýipsizdik Keńesi - bul beıbitshilik pen qaýipsizdik boıynsha óz ustanymdarymyzdy ilgeriletýge múmkindik beriletin jetekshi jahandyq alań. BUU QK músheligi Qazaqstannyń álemdik masshtabtaǵy rólin arttyryp, halyqaralyq kelissózderde elimizdiń jahandyq protsessterdiń turaqty ári jaýapty qatysýshysy retindegi pozıtsııasyn nyǵaıty túsedi. Aıta keteıin, álemde shamamen 50-ge tarta memleket BUU Qaýipsizdik Keńesine múshelikke bir de bir ret saılanǵan emes.
Osydan shırek ǵasyr buryn Memleket basshysy aıqyndaǵan beıbitsúıgish syrtqy saıasattyń satyly ustanymy, jahandyq problemalardy ózara senimdi qalyptastyra otyryp dıalog arqyly sheshý boıynsha strategııalyq qadamdarymyz Qazaqstannyń BUU Qaýipsizdik Keńesine turaqty emes músheligine saılanýǵa septigin tıgizdi. Qazirgi tańda Astana men onyń ustanǵan saıasaty barshaǵa tanymal bolyp otyr. Buny batystyq qana emes, shyǵystyq mentalıtet pen etıkettiń básekege qabiletti sımbıozynyń ereksheligine aınalǵan desek te bolady. Bul rette ózara syılastyq, ıkemdilik, syndarlylyq, qonaqjaılylyq, qatysýshylar úshin saıası jaılylyqty tıisti deńgeıde qamtý, kompromıske daıyndyq kórinisteri týǵandaǵy kelisimge keltirý sheberligi, emotsııalyq ustamdylyq sekildi erekshelikterdi aıtyp otyrmyn.
Jasyratyny joq BUU qabyrǵasynda Qazaqstannyń álemdik arenadaǵy birqatar mańyzdy halyqaralyq bastamalaryna rızashylyqty jıi estımiz. Olardyń qatarynda AÓІSShK pen Álemdik jáne dástúrli din lıderleriniń sezi, Almatydaǵy Iran ıadrolyq baǵdarlamasy jónindegi kelissózder, Sırııa jónindegi Astana protsesi jáne basqa da tıimdi alańdar men ıdeıalar bar. Sonymen qatar, Qazaqstan EQYU, IYU, ShYU sekildi uıymdar men basqa da qurylymdarǵa tabysty tóraǵalyq etýimen álemge tanylǵan bolatyn. Bir sózben aıtqanda, jańa jaǵdaılar úshin medıator retinde aıtarlyqtaı tájirıbe qalyptasqan.
Osynyń bárin qorytyndylaı kelsek, BUU QK Tóraǵalyq Elbasynyń aýqymdy halyqaralyq bastamalaryn ilgeriletý turǵysynan alǵanda da asa mańyzdy ári biregeı múmkindik bolyp tabylady. Qaýipsizdik Keńesindegi tájirıbe BUU júzjyldyq mereıtoıyna oraı belgilengen, Manıfestte kórinis tapqan qaqtyǵystarsyz álemniń strategııalyq maqsattaryna qol jetkizý úshin de ózekti. Bul álemniń basqa memleketterimen ózara árekettestiktegi sapaly jańa deńgeıge kóterip, ekinshi jaǵynan búkil álemge ulttyq basymdyqtarymyz jaıynda málimdeı alatyn úlken múmkindik.
Sondaı-aq, jahandyq aýqymǵa ulasyp jatqan álemniń ár túkpirindegi qaqtyǵystar, BUU QA kóptegen taqyryptyq problemalar - Jappaı qyrý qarýlaryn taratpaý, kontrterrorızm, sanktsııaǵa qatysty ortaq máseleler - osynyń bári bizdiń elimizge belgili bir deńgeıde áser etedi. Osy turǵydan alǵanda, BUU-daǵy Qazaqstannyń ókildigi Memleket basshysynyń beıbitshilik pen damýdyń ózara baılanysyn negizge alǵan tıisti tapsyrmalaryn júzege asyrý baǵytynda jumys istep keledi.
Qazirgi álemniń negizgi problemalardy sheshý máselelerine aralasý arqyly Qazaqstan kóptegen eldermen, óńirlermen baılanysyn damytýǵa múmkindikter alyp otyr. Syrtqy baılanystaǵy geografııa aýqymyn keńeıtý bizdiń kópvektorly saıasatymyzdyń qısyndy jalǵasy, al ondaı basymdyqty Memleket basshysy Táýelsizdiktiń alǵashqy jyldarynda elimizdiń mańyzdy baǵyty retinde aıqyndaǵan bolatyn. Bundaı qadamdar Qaýipsizdik Keńesine elektoraldyq naýqanynda da, búgingi jumysymyzda da kóp kómek boldy.
Budan bólek, osy jumystardyń barlyǵy táýelsizdik jyldarynan beri áleýeti satylap kóterilip kele jatqan qazaqstandyq dıplomatııanyń biliktiliktegi is tájirıbesin arttyrýǵa da septigin tıgizedi. BUU QK arqyly Qazaqstannyń dıplomattary men sarapshylary asa mol ári baǵa jetpes tájirıbe jınaqtap jatyr. Bul tek dıplomatııalyq qyzmettiń kásibıligin arttyryp qana qoımaı, tutastaı memlekettik apparattyń, elimizdiń eksperttik jáne medıa qaýymdastyǵynyń bedelin kóteredi.
Osy maqsatta Qazaqstannyń Syrtqy ister mınıstrligi BUU DB birlese otyryp 2017 jyldyń qazan jáne qarasha aılarynda otandyq jetekshi BAQ pen saraptamalyq ortalyq ókilderine arnap trenıng ótkizgen bolatyn. Qazaqstandyq sarapshylar Qaýipsizdik keńisiniń «ishki qazany» qalaı qaınap jatqanymen jaqynyraq tanysty, jahandyq kún tártibiniń ózekti máseleleri qalaı talqylanatynyn, shuǵyl otyrystar boıynsha ashyq jáne jabyq formattar (Soltústik Koreıa men Sırııa máseleleri boıynsha) qalaı órbıtinin baqylady. Qaýipsizdik Keńesindegi mundaı teńdessiz tájirıbe bizdiń mamandar úshin halyqaralyq saıasattaǵy aǵymdaǵy tendentsııalardy, olardyń erekshelikteri men nıýanstaryn jaqsy túsinýge septigin tıgizedi dep senemiz.
-Áńgimeńizge rahmet! Jumystaryńyz jemisti bolsyn!
