Qazaqstannyń burynǵy 581 turǵyny qos azamattyǵy úshin jazalandy
ASTANA. QazAqparat - Jyl basynan bastap ishki ister organdary qos azamattyqty alǵany úshin Qazaqtan Respýblıkasynyń burynǵy 581 azamatyn ákimshilik jaýapkershilikke tartty, dep habarlaıdy QazAqparat.
QR ІІM baspasóz qyzmetiniń málimetinshe, Qazaqstannyń azamattyǵyna qabyldaý týraly ótinish berý kezinde qasaqana jalǵan málimetter usynǵan 2 sheteldik azamatqa aıyppul salý túrindegi jaza qoldanyldy.
Budan bólek, QR azamattyǵynyń tólqujatyn nemese jeke kýáligin paıdalanǵany úshin Qazaqstan azamattyǵyn joǵaltqan 281 adamǵa aıyppul salyndy. Shetel azamattyǵyn alý týraly habarlamaǵany úshin jaýapkershilikke 294 adam tartyldy, onyń ishinde 166-syna aıyppul, 128-ine el aýmaǵynan shettetý jazasy qoldanyldy.
Atap aıtqanda, QR Konstıtýtsııasynyń 10-babyna sáıkes Qazaqstan Respýblıkasynyń azamattary basqa memlekettiń azamaty bola almaıdy. Osyǵan baılanysty eger basqa memlekettiń azamattyǵyn alsa, «QR-dyń azamattyq týraly» Zańyna sáıkes qazaqstandyq azamattyq joıylady.
Qazaqstandyq azamattyqta turǵan jáne shet memlekettiń azamattyǵyn alǵan adamdar basqa azamattyqty qabyldaǵan kúnnen bastap otyz kúnniń ishinde Qazaqstannyń ishki ister organdaryna nemese Qazaqstan Respýblıkasynyń sheteldegi mekemelerine sheteldik azamattyqty qabyldaǵan faktisi týraly habarlaýǵa jáne Qazaqstan Respýblıkasynyń tólqujaty men jeke kýáligin tapsyrýǵa mindetti.
Sheteldiń azamattyǵyn qabyldaǵany týraly belgilengen merzim ishinde habarlamaǵany úshin Qazaqstan Respýblıkasynyń zańnamasyna sáıkes jaýapkershilikke tartylady.
