Qazaqstannyń boljaldy altyn resýrsy 1,5 myń tonnaǵa jetedi
ASTANA. QazAqparat - Elimizde geologııalyq zertteý jumystarynyń nátıjesinde 1,5 myń tonna altynnyń boljamdy resýrsy anyqtaldy. Bul týraly Astanada ótken baspasóz máslıhatynda QR Investıtsııalar jáne damý mınıstrligi Geologııa jáne jer qoınaýyn paıdalaný komıtetiniń tóraǵasy Aqbatyr Nadyrbaev málim etti, dep habarlaıdy «QazAqparat» HAA tilshisi.
«Geologııalyq zertteý jumysyn júrgizýdiń nátıjesinde boljamdy resýrstardy anyqtaý jospary oryndaldy. Naqtyraq aıtqanda, izdeý jáne izdeý-baǵalaý jumystarynyń qorytyndysy boıynsha jańa ken obektileri anyqtaldy. 1,5 myń tonna altynnyń, 28,2 mln tonna mystyń, 22,6 mln tonna polımetalldyń (búkil Qazaqstan aýmaǵy boıynsha - avt.) boljamdy resýrstary belgili boldy. Bul kórsetkishter bizdiń mınıstrliktiń maqsatty ındıkatorlaryna engizildi», - deıdi Aqbatyr Nadyrbaev.
Komıtet tóraǵasy sonymen qatar Qaraǵandy kómir basseınindegi metandy geologııalyq turǵyda zertteý jumystary júrgizilgenin atap ótti. Osynyń nátıjesinde 7 perspektıvaly ýchaskede kómir qataryndaǵy metandy izdeý jumystaryn júrgizý usynylyp, metannyń 14 mlrd tekshe metr mólsherdegi boljamdy resýrsy eseptelgen.
«Sońǵy ýaqytta álemde lıtııge degen suranys artyp ketti. Osyǵan baılanys Qazaqstan aýmaǵynda lıtıı qoryn izdeý baǵytyndaǵy jumys jandanǵan bolatyn. Ótken jyly Shyǵys Qazaqstan oblysynyń Ahmer ýchaskesinde lıtıı izdeý jumystary júrgizildi. Jumys nátıjesi boıynsha onda qalaıy men lıtııdiń boljamdy resýrstary anyqtaldy», - dedi Aqbatyr Nadyrbaev.
