Qazaqstannyń bolashaqqa belgilegen uly mindetterin oryndaýǵa Elbasynyń ózi bastap barýy tıis - Q. Aıtahanov
ASTANA. 6 qańtar. QazAqparat /Qanat Mámetqazyuly/ - Qazaqstannyń bolashaqqa belgilegen uly mindetterin oryndaýǵa Elbasynyń ózi bastap barýy tıis. Búgin QR Parlamenti Senatynyń jalpy otyrysynda «QR Konstıtýtsııasyna ózgeris engizý máselesi boıynsha Qazaqstan Respýblıkasy Prezıdentiniń respýblıkalyq referendým taǵaıyndaýy týraly» Parlament depýtattarynyń usynysyn talqylaý barysynda senator Qýanysh Aıtahanov osylaı málim etti.
«Elimiz táýelsizdiktiń 20 jyldyǵyna qaraı qadam basty. Osy tarıhı qysqa merzimde táýelsiz Qazaqstan Prezıdent N. Nazarbaevtyń basshylyǵymen nebir qıyn-qystaý kezeńderden súrinbeı ótip, tolaǵaı tabystarǵa jetti. Qarqyndy damý jolyna tústi. El de, qoǵam da, zaman da jańǵyrdy. N. Nazarbaev Qazaq elin búkil álemge tanytty. Árbir qazaqstandyq ózine «buryn kim edik, qazir kimbiz?» degen suraqty qoıyp oılansa, bzdiń elimizdiń búgingi jetistikteri kóz aldymyzǵa keledi. Kókiregińdi óz elińe, Elbasyńa degen rızashylyq sezimder maqtanyshy kerneıdi. Búginde Táýelsiz Qazaqstan Prezıdenti N. Nazarbaevtyń esimi óz ultymyzdyń ǵana emes, búkil túrki jurtynyń kósemi retinde tórtkúl dúnıege tegis málim», - dedi depýtat.
Onyń aıtýynsha, Qazaqstannyń aldynda Memleket basshysy belgilep bergen óte kúrdeli, bıik mindetter men asqaraly asýlar tur. Osyǵan oraı, senator «elimizdiń turaqty ári qaryshty damýyn qamtamasyz etetin uly mindetterdi oryndaýǵa, Qazaqstannyń negizin qalaýshy jáne ony qurýshy álem moıyndaǵan qaıratker N. Nazarbaevtyń ózi bastap barýy tıis» degen pikirin jetkizdi.
«Sondyqtan, elimizdiń jarqyn bolashaǵy úshin Tuńǵysh Prezıdent - Elbasy N. Nazarbaevtyń ókilettigin uzartý týraly úndeýdi, soǵan baılanysty Konstıtýtsııaǵa engizilgen ózgeristerdi qoldaýǵa shaqyramyn. Bul eldiń eldigin, ultymyzdyń ulylyǵyn halqymyzdyń birligin tanytady», - dedi Q. Aıtahanov.
