Qazaqstannyń bolashaǵy ıntellektýaldy adamdardyń qolynda - G.Qaraǵusova
ALMATY. 28 aqpan. QazAqparat /Ádilet Musahaev/ - Elbasynyń «Bolashaqtyń irgesin birge qalaımyz!» atty bıylǵy Joldaýy birinshi kezekte jas býynǵa baǵyttalǵan.
Bul jaıynda búgin Qazaqstan Respýblıkasynyń Parlament Májilisiniń depýtaty, Tómengi palatanyń Qarjy jáne bıýdjet jónindegi komıtetiniń tóraıymy Gúljan Qaraǵusova ál-Farabı atyndaǵy QazUÝ-de ótip jatqan «Zııatkerlik - ult bolashaǵy» atty jastar forýmynda aıtty.
"Bizdiń býyn táýelsizdik negizin qalady. Al sizderge táýelsizdigimizdi nyǵaıtyp, myqty ári ekonomıkalyq damyǵan eldi qurýǵa týra keledi. Sizder ómir joldaryńyzdy jahandyq dáýirdiń ózgeristerimen bastaǵaly otyrsyzdar. Búgingi ekonomıkalyq daǵdarys júıelik sıpat alýda jáne ol múlde jańa qadamdardy kútedi. Búgingi basty baılyq -ınnovatsııa men jańa tehnologııalar bolyp tabylady jáne onymen ár el maqtanady",- dep atap ótti óz sózinde G.Qaraǵusova.
Bilgir ekonomıstiń paıymdaýynsha, Qazaqstannyń bolashaǵy ıntellektýaldy adamdardyń qolynda. "Bilim - bul árqashan aqtalatyn ınvestıtsııa, sondaı-aq ol adamdy órkendetip, táýelsiz qylady", -deıdi ol. Depýtat jastardy aldaryna úlken maqsattar qoıa bilýge, eńbeksúıgishtikke ári ózdiginen bilimderin jetildirýge shaqyrdy.
