Qazaqstannyń bokstan áıelder quramasy Azııa birinshiligine tolyq quramda qatysady
ASTANA. QazAqparat - Áıelder arasynda bokstan bıylǵy Azııa chempıonaty Hoshımın (Vetnam) qalasynda ótedi, dep habarlaıdy QazAqparat Azııa boks konfederatsııasynyń baspasóz qyzmetine silteme jasaı otyryp.
Jarys ótkizýshi eldiń, sondaı-aq Úndistan, Qazaqstan jáne Ózbekstan komandalary tolyq quramyn jarııalady.
«Tirkeý erejelerine sáıkes, áıelder arasyndaǵy qurlyq birinshiligine 22 elden 118 sportshynyń qatysýy josparlanyp otyr. Sońǵy tórt chempıonattyń dınamıkasyna qarap Azııada áıelder boksynyń aıtarlyqtaı damyǵan kórýge bolady. Týrnır debıýtanttaryn da erekshe atap kórsetken oryndy, olar - Kambodja, Laos, Mıanma, Sıngapýr komandalary», - deıdi Azııa boks konfederatsııasynyń atqarýshy dırektory Baǵdáýlet Tórehanov.
Eske sala ketsek, 2008 jyly Úndistandaǵy jarysqa qurlyqtan 79 sportshy, 2010 jyly Qazaqstanda ótken birinshilikte 16 elden 84 boksshy, 2012 jyly Mońǵolııada 17 elden 82 sportshy, al 2015 jyly Qytaıda ótken jarysqa 16 elden 96 sportshy qatysqan bolatyn.
