Qazaqstannyń boksshy qyzdary Azııa chempıonatynda eki altynnan úmitti
ASTANA. QazAqparat -Ulttyq quramanyń 10 boksshy qyzy Azııa chempıonatyna qatysý úshin Vetnamǵa ushyp ketti, dep habarlaıdy «QazAqparat» HAA Qazaqstan boks federatsııasynyń baspasóz qyzmetine silteme jasap.
2 qarasha kúni Hoshımınde ótetin jarystarda Qazaqstan namysyn Olımpıada júldegeri Darıǵa Shákimova (75 kg), eki dúrkin álem chempıony Nazym Qyzaıbaı (51 kg), álem chempıony Dına Jolaman (54 kg), Valentına Halzova (69 kg), Lázzat Kúngeıbaeva (81 keliden joǵary), sondaı-aq Alýa Balqybekova (49 kg), Nazym Işanova (57 kg), Rımma Volosenko (60 kg), Madına Nurshaeva (64 kg) jáne Móldir Bazarbaeva (81 kg) qorǵaıtyn bolady.
Chempıonat bastalmas buryn komandada klımatqa beıimdelý jáne kúsheıtilgen jattyǵý júrgiziledi.
Quramanyń bas bapkeri Vadım Prısıajnıýk qurlyq birinshiliginde básekelestiktiń joǵary bolatynyn atap ótti.
«Áıelder boksy Eýropaǵa qaraǵanda, Azııada kúshtirek bolady dep oılaımyn. Bizdiń basty qarsylastarymyz - Úndistan, Ońtústik Koreıa jáne Qytaı komandalary bolmaq. Biraq, biz jaqsy daıyndalyp, qajetti deńgeıge kóterildik jáne elimizge eki altyn medal alyp kelemiz dep úmittenemin», - dedi bas bapker.
