Qazaqstannyń bıylǵy JІÓ qandaı deńgeıde bolady

NUR-SULTAN. QazAqparat – Qazaqstannyń jalpy ishki ónimi bıyl qandaı deńgeıde bolýy múmkin? Tómendeı me, álde byltyrǵy ósimdi saqtap qala ala ma? Bul suraqqa Ulttyq ekonomıka mınıstri Rýslan Dálenov jaýap berdi, dep habarlaıdy QazAqparat tilshisi.

«69 trln 680 mlrd teńge – jalpy ishki ónimniń bıylǵy boljamdy kólemi osyndaı bolǵan. Bul boljamdy kórsetkish osy jyldyń sáýir aıynda bekitilgen. Qazirgi ýaqytta baǵalaý jumystaryn turaqty túrde júrgizip kelemiz. Sońǵy esepterge sáıkes, bizdiń boljam boıynsha bıylǵy jalpy ishki ónim 69 trln 803 mlrd teńge deńgeıinde bolýy múmkin. Resmı boljamǵa eshqandaı ózgeris engizilgen joq», - dedi Rýslan Dálenov OKQ-da ótken baspasóz máslıhatynda.

Mınıstrdiń aıtýynsha, qyzmet kórsetý salasy qazir qysymǵa ushyraǵanymen, ekonomıkalyq ósim boıynsha boljam burynǵy deńgeıde qala beredi.

«Sonymen birge biz el ekonomıkasynyń oń ósimine qol jetkizý úshin tyrysyp, osy jyldy oń nátıjemen aıaqtaýdy kózdep otyrmyz. Sebebi elde daǵdarysqa qarsy sharalar qabyldanyp, qazirdiń ózinde jaǵymdy ózgerister baıqalady», - dedi ol.