Qazaqstannyń bitimgerlik kúshteri qaı mıssııalarǵa qatysyp júr

ASTANA. QazAqparat - Búgin Eýrazııalyq medıa forýmnyń Sırııa daǵdarysyna arnalǵan sessııasynda QR Syrtqy ister mınıstri Qaırat Ábdirahmanov Qazaqstan men Qyrǵyzstannyń BUU-nyń birqatar bitimgerlik operatsııalaryna atsalysyp jatqanyn jetkizdi. Otyrystan keıin jýrnalısterge suhbat bergen mınıstr qazaqstandyq bitimgerlerdiń qaı jerde qyzmet atqaryp júrgenin aıtyp berdi, dep habarlaıdy QazAqparat tilshisi.

"Bizde "Qazbrıg" degen bitimgerlik brıgadanyń bar ekenin jaqsy bilesizder. Olar tek BUU Qaýipsizdik keńesiniń qarary bolǵan jaǵdaıda ǵana san alýan bitimgerlik operatsııalarǵa qatysa alady. Osy ýaqytqa deıin bizdiń 15 ofıtserimiz birneshe bitimgershilik operatsııaǵa qatysty. Olardyń 11-i qaıtyp keldi. Búginde 4 ofıtserimiz Batys saharada Birikken Ulttyr Uıymy ótkizetin referendýmda baqylaýshy retinde qyzmet atqaryp júr", - deıdi Ábdirahmanov.

Mınıstrdiń aıtýynsha, qazaqstandyq ofıtserlerdiń daıyndyǵyna joǵary baǵa berilip jatyr. Osy ýaqytqa deıin biraz marapattar da boldy. Al elge qaıtyp kelgen sarbazdar laýazymy jaǵynan kóterildi. 

Aıta keteıik, búgingi sessııada mınıstr Qaırat Ábdirahmanov Sırııa máselesin sheshý jolynda Qazaqstannyń saıası yqpalǵa túspeıtinin jetkizdi.  Astana protsesiniń ózi elimizdiń ortaq iske qosqan úlken úlesi bolyp sanalady. Al qaqtyǵys aımaqtaryna ásker jiberý máselesi tek BUU deńgeıinde ǵana qaralýy shart .  Qazirgi kezde Memleket basshysy usynǵan Astana kodeksiniń jobasy BUU-da daıyndalyp jatyr .