Qazaqstannyń birneshe óńirinde qatty jel birqatar nysannyń shatyryn ushyryp áketti
ASTANA. 3 mamyr. QazAqparat - Sársenbi kúni keshke Qyzylorda oblysynda 15-20 m/s jyldamdyqpen soqqan quıyndy jeldiń saldarynan birneshe nysannyń shatyry ushyp ketti, dep habarlady QR Tótenshe jaǵdaılar mınıstrliginen.
Máselen, Qarmaqshy aýdany, Tóretam kentindegi úsh qabatty № 85 mektep shatyrynyń 350 sharshy metr aýmaǵy, aýdandyq aýrýhana shatyrynyń 500 sharshy metr aýmaǵy kókke ushty. Sondaı-aq Jalaǵash aýdanyndaǵy Shámenov eldi mekeninde № 34 mekteptiń úsh qabatty ǵımaratynyń 551 sharshy metr shatyry, Tań eldi mekeninde № 118 mekteptiń úsh qabatty ǵımaratynyń 100 sharshy metr, Qazaly aýdany Áıteke bı kentinde úsh qabatty № 249 mektep ǵımaratynyń 120 sharshy metr shatyry ushyryldy. Jel sondaı-aq Qyzylorda qalasynda Abaı dańǵylynda ornalasqan bir qabatty «Kaspıı banki» ǵımaratynyń, Tasbóget kentindegi - mektep pen Oqýshylar saraıynyń, Qyzylordadaǵy qalalyq ІІB-niń ýaqytsha ustaý abaqtysynyń shatyrlaryn ushyryp áketti.
«Kaspıı bank» ǵımaratynyń aýmaǵynda 33 jastaǵy er adam basyna jaraqat alyp, aýrýhanaǵa jetkizildi. TJ saldaryn joıý jumystaryna Qazaly aýdandyq Tótenshe jaǵdaılar bóliminiń 2 adamy men 1 tehnıkasy, Qarmaqshy aýdandyq TJB-niń 3 adamy men 1 tehnıkasy, Jalaǵash aýdandyq TJB-niń 3 adamy men 1 tehnıkasy, Qyzylorda qalalyq TJB-niń 5 adamy men 2 tehnıkasy, QR TJM-niń «Ońtústik aeromobıldi jedel-qutqarý jasaǵy» MM-niń 15 adamy men 3 tehnıkasy, jaryq jóndeý brıgadalarynyń 3 tehnıkasy jumyldyryldy.
Budan basqa, keshe keshke Pavlodar oblysyndaǵy Ekibastuz qalasynda qatty jeldiń saldarynan Qazynashylyq ǵımarat shatyrynyń 300 sharshy metr aýmaǵy julynyp, elektr taratý jelileri búlindi. Qurbandar men zardap shekkender joq. Elektr taratý jelisindegi apat eki saǵattan keıin joıyldy.
Sondaı-aq, sársenbi kúni Atyraýda keı jerlerde sekýndyna 25 metr jyldamdyqqa deıin uıytqı soqqan jel aǵashtardy qulatyp, elektr taratý jelilerin búldirdi. «Qazaqstan-Atyraý» Respýblıkalyq teleradıo kesheni AQ-nyń, Atyraý oblysyndaǵy Qylmystyq-atqarý júıesi komıteti basqarmasynyń № 9 tergeý abaqtysy ǵımarattarynyń shatyrlaryn ushyryp áketti. TJ saldaryn joıý jumystaryna oblystyq TJD-niń 2 adamy men 1 tehnıkasy, QR TJM-niń «Batys aımaqtyq aeromobıldi jedel-qutqarý jasaǵy» MM-niń 8 adamy men 2 tehnıkasy, «Atyraý-Jaryq» AQ elektr mamandarynyń jóndeý brıgadalary qatysty.
