Qazaqstannyń birneshe óńirinde COVID-19 naýqastary kóbeıdi – Bas sanıtarlyq dáriger
NUR-SULTAN. QazAqparat – QR Densaýlyq saqtaý vıtse-mınıstri – Bas memlekettik sanıtar dáriger Erlan Qııasov eldegi epıemıologııalyq jaǵdaıdy baıandady, dep habarlaıdy QazAqparat tilshisi.
«Qazaqstan Respýblıkasynda 13 qańtardaǵy jaǵdaı boıynsha COVID-19-ben aýyrǵan 164 477 naýqas (COVID+) jáne 46 499 naýqas (COVID-) tirkeldi. Naýqastardyń 87 paıyzy saýyǵyp shyqty, onyń ishinde 150 427 COVID+ jáne 34 118 COVID-19 naýqas bar. 13 qańtardaǵy jaǵdaı boıynsha, aýrýhanalarda 5732 naýqas, al reanımatsııada – 357 naýqas jatyr», - bas memlekettik sanıtar Ortalyq kommýnıkatsııalar qyzmetinde ótken brıfıngte.
Onyń aıtýynsha, sońǵy aıda koronavırýs ınfektsııasy boıynsha epıdjaǵdaıjyń nasharlaýy baıqalyp otyr. QR «jasyl» aımaqtan «sary» aımaqqa aýysty. Sary aımaqtan «qyzyl» aımaqqa eki oblys – Qostanaı jáne Aqmola oblystary aýystyryldy.
Qazirgi tańda «sary» aımaqta – Almaty, Nur-Sultan qalalary, SQO, Pavlodar, Atyraý oblystary bar. Sondaı-aq, qańtar aıynda Batys Qazaqstan oblysy «jasyl» aımaqtan sary aımaqqa kóshirildi. Qalǵan óńirler «jasyl» aımaqta.
«Sońǵy aıda Atyraý oblysynda naýqastardyń 3,7 esege ósýi baıqalady. Almaty obylsynda – 1,8 esege, Qaraǵandy oblysy men Almaty qalasynda – 1,5 esege ósken.
Mańǵystaý oblysynda – naýqastar sany 81-den 315 jaǵdaıǵa deıin, Túrkistan oblysynda – 102-den 256 jaǵdaıǵa deıin, Shymkent qalasynda 150-den 195 jaǵdaıǵa deıin, Qyzylorda oblysynda 48-den 135 jaǵdaıǵa deıin ósý baıqalady. Qalyptasqan epıdemıologııalyq jaǵdaı eskere otyryp, búgingi kúni halyqtyń kóp jınalýyn azaıtýǵa baǵyttalǵan karantındik sharalardy kúsheıtý qarastyryldy», - dedi Erlan Qııasov.
