Qazaqstannyń birqatar joldarynda kólik qozǵalysy shekteldi
ASTANA. 18 jeltoqsan. QazAqparat - Boranǵa baılanysty búgin keshqurym elimizdiń birqatar oblystaryndaǵy joldarda kólik qozǵalysy shekteldi. Bul týraly «Qazaqavtojol» RMK-nyń baspasóz qyzmetinen habarlady.
Aqmola oblysy aýmaǵyndaǵy qolaısyz aýa raıyna baılanysty saǵat 17:30-dan bastap «Qostanaı-Áýlıekól-Surǵan» avtojolynyń 232-260 shaqyrymyndaǵy Qostanaı oblysy shekarasy men Surǵan ýchaskesi aralyǵynda avtokóliktiń barlyq túrleri úshin jol jabyldy. Sonymen qatar «Jaqsy-Esil-Buzylyq» jolynyń 0-82 shaqyrymynda, «Jezqazǵan-Petropavlovsk» jolynyń 377-595 shaqyrymyndaǵy Qostanaı oblysy shekarasy men SQO aralyǵynda, sondaı-aq «Ekaterınbor-Almaty» avtojolynyń 856-990 shaqyrymyndaǵy SQO-shekarasy men Atbasar ýchaskesinde qozǵalys shekteldi.
Al Qostanaı oblysynda aýmaǵynda boranǵa baılanysty «Qostanaı-Áýlıekól-Surǵan» jolynyń 108-232 shaqyrymyndaǵy Áýlıekól men Aqmola oblysy aralyǵynda, «Jezqazǵan-Petropavlovsk» jolynyń 252-377 shaqyrymyndaǵy Qaraǵandy oblysy shekarasy men Aqmola oblysy shekarasy ýchaskesinde joldar jabyldy.
Aqtóbe oblysyndaǵy «Samara-Shymkent» jolynyń 773-965 shaqyrymyndaǵy Aqtóbe men Qarabutaq, «Aqtóbe-RF shekarasy» jolynyń 21-135 shaqyrymyndaǵy Prıgorodnyı men RF shekarasy ýchaskesinde, «Qandyaǵash-Embi-Shalqar-Yrǵyz» jolynyń 91-257 shaqyrymyndaǵy Embi men Shalqar aralyǵynda, «Qarabutaq-Rýdnyı-Qostanaı» jolynyń 0-231 shaqyrymyndaǵy Qarabutaq pen Qostanaı oblysy shekarasy aralyǵynda kólik qozǵalysyna shekteý engizildi.
«Qazaqavtojol» RMK-da avtomobıl joldarynyń jabylǵan ýchaskeleri jóninde halyqty habardar etý úshin táýlik boıy dıspetcherlik qyzmet jumys isteıdi: Astana qalasynda 8 (7172) 444-777 telefony arqyly málimet alýǵa bolady.
