Qazaqstannyń birqatar ÚEU «paralleldi koferentsııaǵa» qatysa almaı otyr - S. Galıeva
ASTANA. 27 qarasha. QazAqparat /Qanat Mámetqazyuly/ -Qazaqstannyń birqatar úkimettik emes uıymdary «ÚEU paralleldi konferentsııasyna» qatysa almaı otyr. Búgin elordada EQYU aıasyndaǵy Sholý konferentsııasy aıasynda «Molodejnyı medıa-soıýz Kazahstana» jeke qorynyń basshysy Svetlana Galıeva osylaı málim etti.
Sóz arasynda elimizdegi adam saýdasy taqyrybyna qatysty atqarylyp jatqan sharalarǵa toqtalǵan qor basshysy,osy baǵytta aqparattyq naýqannyń tıimdi tustaryna toqtalyp ótti. Budan bólek, óz sózinde S. Galıeva áleýmettik jaǵynan az qorǵalǵan balalarǵa qatysty jekemenshik qordyń aınalysatyn sharalarynyń tájirıbelik tıimdilikterine nazar aýdardy.
«Sóz sońynda bıik minberdi paıdalanyp jaqyn kúnderi ótetin «paralleldi konferentsııaǵa» qatysty bir máseleni kótergim keledi. Meniń uıymym jáne Qazaqstannyń basqa da 70-ten astam Úkimettik emes uıymdary «ÚEU paralleldi konferentsııasyna» qatysý týraly óz ótinishterimizdi jasap, tapsyrys bergenimizben osy ýaqytqa deıin eshqandaı jaýap ta, túsinikteme de alǵan joqpyz. Sondyqtan da, biz áli kúnge bundaı sharaǵa qatysa alatynymyzdy bilmeı otyrmyz. Degenmen, bizdiń aqparatymyz boıynsha Qazaqstannyń 20-dan astam uıymy bundaı sharaǵa qatysý týraly usynysty alǵan. Sonda bul sharany uıymdastyrýshylar bireýge sammıtke qatysýǵa ruqsat berip, endi bireýdi elemeýde qandaı máseleni basshylyqqa alady eken? Sony bilgimiz keledi», - dedi S. Galıeva.
Bul eskertýdi qaperge alǵan EQYU DIAQB ókili jaǵdaıdy anyqtaýǵa ýáde berdi.
