Qazaqstannyń birqatar óńirlerinde respýblıkalyq joldar jabyldy-«Qazaqavtojol»
ASTANA. 14 jeltoqsan. QazAqparat - Qatty aıazǵa baılanysty Qazaqstannyń birqatar óńirlerinde respýblıkalyq joldar jabyldy. Bul týraly búgin «Qazaqavtojol» RMK baspasóz qyzmeti habarlaıdy.
Atap aıtqanda, 16:30-dan bastap aýa temperatýrasynyń kúrt tómendeýine baılanysty Pavlodar oblysy boıynsha barlyq baǵyttarda avtokóliktiń barlyq túrlerine jolǵa shyǵýǵa tyıym salyndy.
Sonymen qatar búgin keshqurym Qaraǵandy oblysy boıynsha barlyq baǵyttarda qoǵamdyq, júk jáne dızel otynymen júretin avtokólikterdiń qozǵalysyna shekteý engizildi.
Budan bólek, saǵat 17:00-den bastap Shyǵys Qazaqstan oblysy boıynsha barlyq baǵyttarda qoǵamdyq jáne dızel otynymen júretin avtokólikter úshin jol jabyldy.
2012 j 14 jeltoqsan "Omby-Maıqapshaǵaı" jolynyń 587-733 shaqyrymyndaǵy "Pavlodar obl. shekarasy-Semeı qalasy" aralyǵynda da avtokóliktiń barlyq túrleri úshin shekteý qoıyldy.
Al Almaty oblysy boıynsha saǵat 17:00-den beri aýa temperatýrasynyń kúrt tómendeýine baılanysty "Almaty-Óskemen" avtojolynyń 558-615 shaqyrymyndaǵy "Rýbej beketi- Shyǵys Qazaqstan oblysy shekarasy" aralyǵynda qoǵamdyq jáne dızel otynymen júretin avtokóliktiń qozǵalysyna tyıym salyndy.
Aıta keteıik, keshe saǵat 19:00-den bastap aýa temperatýrasynyń kúrt tómendeýine baılanysty Aqmola oblysy boıynsha barlyq baǵyttarda qoǵamdyq, júk jáne dızel avtokóliginiń qozǵalysyna shekteý engizilgen bolatyn.
