Qazaqstannyń birqatar óńirlerinde boranǵa baılanysty respýblıkalyq mańyzy bar joldarda kólik qozǵalysy shekteldi
ASTANA. 12 qarasha. QazAqparat - Qazaqstannyń birqatar óńirlerinde boranǵa baılanysty respýblıkalyq mańyzy bar joldarda kólik qozǵalysy shekteldi. Bul týraly «Qazaqavtojol» RMK baspasóz qyzmeti habarlady.
Atap aıtqanda, Shyǵys Qazaqstan oblysy boıynsha (burqasyn boran, kóktaıǵaq) saǵat 15:00-den bastap «Óskemen-Zyrıan-Katon-Karaǵaı-Rahman qaınarlary» (6-65 km) avtojolynyń «Ýshanova-Serebrıansk» ýchaskesinde qoǵamdyq avtokólik úshin ýaqytsha jol qozǵalysy shekteldi. Al saǵat 16:40-tan bastap Qaraǵandy oblysy boıynsha aýa raıynyń qolaısyzdyǵyna baılanysty (qatty jel, jol kórinisiniń shektelýi) qoǵamdyq jáne júk avtokólikterine jolǵa shyǵýǵa tyıym salyndy.
Budan bólek, Aqmola oblysy aýmaǵynda saǵat 17:00-den bastap aýa raıynyń qolaısyzdyǵyna baılanysty (burqasyn boran, jol kórinisiniń shektelýi) «Astana-Ereımentaý-Shiderti» (16-205 km) jolyndaǵy barlyq avtokólikter úshin jol qozǵalysy shekteldi. Osy óńirdegi «Ekaterınbýrg-Almaty» (1280-1335 km) jolynyń «Astana-Qaraǵandy oblysy» ýchaskesi boıynda da qoǵamdyq jáne júk avtokólikteri úshin qozǵalysqa jol jabyldy.
Sonymen qatar Pavlodar oblysy óńirindegi boranǵa baılanysty saǵat 18:00-den beri «Astana-Ereımentaý-Shiderti» (205-259 km) joly, «Qyzylorda-Pavlodar» (1135-1205 km) avtojolynda barlyq avtokólikter úshin jol qozǵalysy shekteldi.
Al saǵat 17.45-ten bastap Soltústik Qazaqstan oblysy boıynsha aýa raıynyń qolaısyzdyǵyna baılanysty (qatty jel, jol kórinisiniń shektelýi) qoǵamdyq jáne júk avtokólikteri úshin jol qozǵalysy shekteldi.
Shyǵys Qazaqstan oblysyndaǵy borannyń saldarynan saǵat 17:50-den beri «Óskemen-Zyrıan-Rıdder-Reseı eli shekara» (0-191 km) avtojolynda qoǵamdyq avtokólik túriniń jol qozǵalysyna shekteý qoıyldy.
Atalǵan jolda avtokólikterdiń úzdiksiz jol qozǵalysyn qamtamasyz etý maqsatynda «Qazaqavtojol» RMK-nyń arnaıy tehnıkalary kezekshilikke shyqty.
«Qazaqavtojol» RMK-da avtomobıl joldarynyń jabylǵan ýchaskeleri jóninde halyqty habardar etý úshin táýlik boıy dıspetcherlik qyzmet jumys isteıdi: Astana qalasynda 8 (7172) 444-777, Qaraǵandy oblysy boıynsha 8 (7212) 77-25-54, Shyǵys Qazaqstan oblysy boıynsha 8 (7232) 26-28-08 telefony arqyly málimet alýǵa bolady.
