Qazaqstannyń birqatar óńirlerinde baǵaly zattar urlaýmen aınalysqan boıjetkender ustaldy
ASTANA. 8 qarasha. QazAqparat /Rýslan Ǵabbasov/ - Aldaý jolymen páterlerge kirip, urlyq jasaǵan 18 jáne 20 jas aralyǵyndaǵy 3 boıjetken ustaldy.
Bul týraly búgin bolǵan baspasóz máslıhatynda qalalyq ІІD Tergeý jónindegi basqarmasynyń bastyǵy Ǵumar Shynybekov aıtty.
«Jasóspirimdermen til tabysyp, senimine kirgen bul boıjetkender olardyń úılerine kirip, aqshalaı qarjyny, baǵaly zattar men buıymdardy urlaǵan»,-dedi ol.
Basqarma bastyǵynyń sózinshe, olar ózderin salyq organynyń nemese turǵyn úı- kommýnaldyq sharýashylyǵy qyzmetkerleri retinde tanystyryp otyrǵan. «Búginde olardyń 20-dan astam páter urlyǵyn jasaǵany belgili boldy»,-dedi ol.
Jedel izdestirý sharalarynyń barysynda olar ustaldy. Tekserý kezinde boıjetkender Ońtústik Qazaqstan oblysynyń azamatshalary ekeni anyqtaldy. Urlanǵan buıymdardy olar lombardtarǵa ótkizip otyrǵan. Árbir qylmystyq epızod boıynsha keltirilgen zalal kólemi 180 myń teńgeden 3 mıllıon teńgege deıingi qarjyny quraıdy.
Páterlerdiń birinen atalǵan qyzdar ańshy myltyǵyn da alyp shyqqan. Keıin ony Esil ózenine laqtyryp jibergen.
«Ózderiniń jasyna qaramastan, olar Almaty jáne Ońtústik Qazaqstan oblystarynyń aýmaqtarynda osy tektes birneshe qylmystar jasap úlgergen. Boıjetkenderdiń biri buryn sottalǵan jáne OQO boıynsha tonaý jasaǵany úshin izdeýde júrgen kórinedi»,-delingen taratylǵan málimetterde.
