Qazaqstannyń birqatar oblystarynda tumaýdyń epıdemıologııalyq deńgeıi joǵary - Densaýlyq saqtaý mınıstrligi
ASTANA. 29 qańtar. QazAqparat - Densaýlyq saqtaý mınıstrliginiń habarlaýynsha, qazirgi tańda Shyǵys Qazaqstan, Batys Qazaqstan, Pavlodar, Qostanaı, Qaraǵandy jáne Soltústik Qazaqstan oblystarynda tynys jolynyń ótkir vırýstyq ınfektsııasynyń epıdemıologııalyq deńgeıi shamadan asyp otyr.
Naýqastardyń negizgi úlesin jańa týǵan sábıden bastap 14 jasqa deıingi balalar qurap otyr, olardyń úles salmaǵy 69,5 paıyz.
Medıtsınalyq kómekke júgingenderdiń 3,7 paıyzy tynys jolynyń ótkir vırýstyq ınfektsııasy jáne tumaý dıagnozdarymen aýrýhanaǵa jatqyzylǵan.
Respýblıkanyń mektepke deıingi jáne jalpy bilim berý mekemeleri qalypty rejımde jumys isteýde. Vaktsınatsııa tumaýdyń aldyn alýdyń eń tıimdi ádisteriniń biri bolyp tabylady, respýblıkada 2009-2010 jyldardaǵy epıdemııalyq maýsymda 464 400 adam egilse, búgingi tańda jalpy egilgenderdiń sany 848 067 adamdy qurap otyr.
Densaýlyq saqtaý mınıstrligi bastalǵaly otyrǵan Azııalyq oıyndarǵa baılanysty, Astana, Almaty qalalarynyń áýejaılary men vokzaldarynyń, qonaqúı keshenderiniń, qoǵamdyq tamaqtaný kásiporyndarynyń sanıtarııalyq-gıgıenalyq jaǵdaıyn baqylaýdy kúsheıtip otyr.
Dúnıejúzilik densaýlyq saqtaý uıymynyń derekteri boıynsha, Eýropanyń tórt elinde (Ulybrıtanııa, Irlandııa, Norvegııa jáne Danııa) tumaýmen aýyrýdyń deńgeıi joǵary, qalǵan elderde tumaýdyń epıdemııalyq belsendiligi ortasha qarqynda. Kórshi Reseıdiń soltústik óńirlerinde epıdemıologııalyq kórsetkish ortashadan joǵary.
