Qazaqstannyń birqatar oblystarynda tuman túsip, jel kúsheıedi, kóktaıǵaq bolady - 10 qarashaǵa arnalǵan aýa raıy boljamy
ASTANA. 9 qarasha. QazAqparat - Qazaqstannyń kóptegen aýmaǵynda atmosferalyq aǵymdardyń ótýine baılanysty turaqsyz aýa raıy saqtalýda, birqatar aımaqtarda jaýyn-shashyn jaýyp, jel kúsheıedi.
Qazaqstannyń ońtústiginde ǵana jaýyn-shashynsyz ashyq aýa raıy kútilýde, dep habarlaıdy Qazgıdrometke silteme jasaǵan TJM-niń baspasóz qyzmetinen.
Mańǵystaý, Pavlodar, Shyǵys Qazaqstan oblystarynda, kúndiz Batys Qazaqstan oblysynda keıbir jerlerde jeldiń jyldamdyǵy 15-20 m/s deıin jetedi, Shyǵys Qazaqstan oblysynda kúndiz burqasyn bolady.
Atyraý oblysynyń birqatar aımaqtaryna tuman túsedi.
Jambyl oblysynda túnde keıbir jerlerde tuman túsip, 15-20 m/s deıin jyldamdyqpen jel soǵýy yqtımal.
Aqtóbe, Qostanaı oblystarynda túnde jáne tańerteń keıbir jerlerde tuman túsedi, kúndiz jel 15-20 m/s jyldamdyqpen soǵady, Qostanaı oblysynda kúndiz keıbir jerlerde kóktaıǵaq bolady.
Aqmola oblysynda túnde jáne tańerteń keı jerlerde tuman túsedi, birqatar aımaqtarda kóktaıǵaq bolyp, jeldiń jyldamdyǵy 15-20 m/s deıin kúsheıýi yqtımal.
Almaty oblysynda túnde jáne tańerteń keıbir jerlerde tuman túsedi, Jalańashkól aýdanynda jel jyldamdyǵy 20-25 m/s deıin, ekpini 30 m/s deıin kúsheıýi múmkin.
Soltústik Qazaqstan oblysynda keı jerlerde tuman, kóktaıǵaq bolady, túnde jeldiń kúshi 15-20 m/s deıin jetýi yqtımal. Qaraǵandy oblysynyń keıbir jerlerinde tuman túsedi, jeldiń kúshi 15-20 m/s deıin jetedi.
Jaqyn úsh táýlikte Qazaqstannyń soltústik, soltústik-shyǵys, ortalyq jáne shyǵys oblystarynyń sýlarynda muz qatady, soǵan baılanysty jekelegen ózenderde sý deńgeıi kóterilýi múmkin.
Respýblıkanyń qalǵan aýmaǵyndaǵy ózenderde sý betiniń salqyndaýy baıqalady. Ońtústik Qazaqstan oblysynyń taýly ózenderinde jaýyn-shashynǵa baılanysty sý deńgeıi kóterilýi yqtımal.
